عــود ريحـانك …بقلم خون أنوب الجديد معوض حلمي منشأة بطاش .. تمي الأمديد .. دقهلية

عــود ريحـانك …بقلم خون أنوب الجديد معوض حلمي منشأة بطاش .. تمي الأمديد .. دقهلية

أنا كنت فاكرك حضن ضد البرد
وقت اما اعوزك تحضنيني بجد
ولما جيـتلك توهـت م الدهـشه
سيبتيني للرعشه والشعور بالبرد

مش كنتي ساقيه ، وقله ترويني
وانتي اللي مالـيه كـل تكـويني
قوليلي ليه حـرمـاني من عزك
وانا لسـه عايزك ضـله تأويـني

بابوس بفاسي ، الارض تتمعشق
تخضر عايقه ، والعيـون تعشـق
واروي الغيطان الحاضنه لعيداني
وافتح بيباني لفجرها يشقـشق

أنا قيس وعاشـق ، باينه أحوالي
ليــــلايا هيــــه ، وهيـه مـوالي
تسرح تروح ، ع الرمـوش تمشي
وابني لها عشي قصـر م العالي

أنا عـود ريحانك وانتي مراويا
محــــتاج حنـانك ضـــي لعـنيا
مدي لي إيدك طبـطـبي وداوي
وابنـي الغـناوي ليــــكي بنـــيه

كل اللي باعوا سابوا ف إيديكي
وانا لسه غاوي الكحل ف عنيكي
قلبي اللي حـبك زي صفصـافه
يرمـي بلطـافه الضـل حواليكي

لسـاكي ماشـيه بتندهي وشـكه
على حـد سابك تايهه ع السـكه
ماترمـي نظـره ع اللي حـبـوكي
تلـقي الصعيـبه المعـضــله فكـه

كل الكلام ف عنيكي مش مفهوم
وانا جـوا بير القلــــق موهـوم
هو انـتي بصحيح بنت الفـرح
والا انتي وقت الجد بنـت همـوم ..؟

سارح يوماتي باغـني ع الكـارو
وانده صحابي لـو هـناك مـروا
رامـي حمـولي ع الغـني الفتاح
قلبي مـرتاح وخـالي من شـره

فـلاح ولابس هدمتي الكاستور
على بابها نايم ف الخـلا مستور
الإسـم شـاعر ، ونقـبي بطـاشي
ع الترعه ماشي ومن ورايا طيور

تقسى ماتقسى ، برضه عجباني
دا عينيها مرسى وعزمها حصاني
مين اللي قال الحب دا غوايه
دا الحــــب آيه ، وســـر رباني