علشان نبنيها
بقلم/زين ممدوح
كعادته كل مساء، يجلس على مقهى مجاور لمنزله.
ذات مره التقى صديقه عوضين فدعاه للجلوس.
تشرب إيه يا عوضين
رد باستغراب ما أنت عارف يا شحاته هو فى غيرها الحلبه.
وطول عمرنا بنشربها من صغرنا.
خلاص يا عوضين عِرفنا.
.وبعدين ما هو احنا كمان بنشربها.
ولا فاكرنا بنشرب نسكويك يعنى.
المهم انت عارف الشغل اليومين دول يوم فيه وعشره مفيش . والنقاشه حالها واقف.
ممكن قرشين سلف على ما تفرج.
_ مش لازم مقدمات إحنا اخوات .هشوف حالى وأرد عليك.. الحاجه بقت نار وكنا بنعمل جمعيتين دلوقتي بنعمل واحده بطلوع الروح .
بس اعتبر الموضوع منتهى.
ده العشم برضه.
بس لو حال البلد يمشى شوية يا عوضين.
تفتكر إيه اللى يخلى البلد تعلى كده وتبقى فوق الدنيا. عايزين نشم نفسنا.
شوف يا شحاته البلد دى لازم تتبنى من أول وجديد.
ازاى من أول وجديد.. كده هتاخد وقت كتير على ما تقف على رجلها. ويكون موتنا وشبعنا موت.
طب ونبنيها ازاى يا عوضين.
انت من رأيك شايف نبدا منين.
نبدأ بالتعليم والصحة والبحث العلمي ..والمستثمرين علشان ييجوا عايزين استقرار والحمد لله موجود .
وبعدين هو آنى اللى هفكر.المفروض إن فيه ناس مسؤولة عن المواضيع دى. وتوفر لهم كل حاجه . لكن إحنا عايزين إيه غير الأكل والشرب والأسعار تنزل ،ويهتموا بينا إحنا ملناش دخل ثابت .
فرحنا لما ظهر حقول بترول جديده.قلنا حالنا هيتحسن.لكن إحنا بننزل تحت والأسعار هى اللى بتطلع لفوق.
لا يا شحتاته كده فعلا هيكون جالك السل على ما تشوف الخير والعز ده
احنا لازم نضحى علشان نبنيها
واشمعنا احنا اللى نضحى.واحنا اللى نستحمل.
متفقناش على كده
مفيش حلاوة من غير نار يا شحاته
بس النار طولت قوى يا عوضين.مخلتش حيلتنا حاجه.ومش عارفين بكره الحلو ده جاى إمتى.
أنا هقولك بقى على أسرع طريقة نبنى بيها البلد
والخير ييجى بفركة كعب زى ما قالوا زمان.
,طب قول يا أبو العُريف .يامهندس زمانك
احنا نجيب ألف طوبه وشوية عمال وشرفك ابنيهالك ف شهر!
_علشان أنت بنّا فاكرها سهله
قوم يا عوضين قوم . وحاسب على الحلبة
آنى غلطان إنى ندهت عليك !
التعليقات مغلقة.