على القالب…أشرف الشناوي شاعر عامية البرامون المنصورة
بدون تكليف
ولا هيصه
ولا زيطه
يوماتي باخش
في الحيطه
وباتبعتر وباتبعزق
والزق روحي جوايا
واسلمني لنفسي سليم
وارش الحلم بالميه
واغربل كل مافيا
الاقي الضحكه منفيه
وحزني عويل
بياكل فيا وبينهش
كما المهابيل
وكل مانور الحته
يطفيلي الوجع قناديل
وانادي الصبح واستني
لمالك يفتح الجنه
يعدي الفجر بمشنه
ولا غنا ولا سمعنا
في يوم مواويل
ويشد الروح من الجته
ويفرشها على السكه
يبيعها في سوقه بالوقه
وللمساطيل
وياخد مركبي المالح
ويرميها في حضن الموج
تروح ماتجيش
ويحبس قلبي في الغنوه
اللي متعديش
يشد ملامحي يعدلها
مع الطرابيش
ويصلبها على القالب
وينفخها عشان ماتعيش؛
والم أحلامي بالحته
واعافر بيها في الشده
تاكلني الصقعه والعته
تسيبني مافيش
ياليل نازل بحراسه
وقالع لينا في لباسه
يدقدق فينا ويكسر
وبيبصر ويقش الكوم
ويسلم روحنا لديابه
ماتعرف نوم
ونستني الأمل تاني
مابين الجرح والتاني
نعدي اليوم ……………..
التعليقات مغلقة.