على ايه مهموم … بقلم رضا أبو الغيط
علي ايه مهموم
وبتشكى دموعك م الدنيا
وهوان الحال
وتملى عيونك مشغولة
بالسقف الساند ع الحيطة
وعيونه الجوز اللي مانامت
كٍيف الغربال
وكأنك هارب م الدنيا
لنجوم الليل اللى ما فكر
يسأل ع الحال
اسمعني أُمال
وبلاش أحزانك تتمكن
من راحة البال
حسك بالدنيا .. يا ابوعيالى
والدنيا مش بس الأموال
الدنيا ف صحة بتفتحلك
سد الحوال
الدنيا ف زوجة بتملالك
الدار بعيال
وف أم بتسهر تدعيلك
تطرحلك شمعة قنديلك
م الفرح جبال
الدنيا لسان دايما يحمد
ربك ع الحال
قوم بس ننام وبلاش تفكير
والخير اللى انت زرعته ف يوم
راح يطرح بدل القمح فطير
وعسل مش عند أجدع نحال
على ايه مهموم
والدنيا ما فيها شيئ بيدوم
وف طرفة عين
ربك بيبدل ف الاحوال
قوم بينا ننام وبلاش أوهام
والليل راح يولد فجر جديد
هيطوف ع الدار
ومعاه مرسال
هيقولك : إن المولى كبير
وحِداه الخير
اللى هنملابه …. ألف شوال
ربك ده عظيم
مين غيره لناس
مش لاقية ليالي اللقمة الحاف
ولحافها الخيش
هربان من برد الشتا بيخاف
يلمحه بيحابي على الأطفال
اضحك يا حزين
وكفاية جدال
واتوكل
ع اللى ما رد لحد سؤال
التعليقات مغلقة.