على لسان ام الشهيد .. بقلم الشاعر / مدحت رياض
آخر ما شفتك وانت خارج والسلام
وشك بيضحك زي يوم عرسك تمام
كل الكلام ميكفينيش وصف لعينيك
لمسة إيديك……. كات جنتي
مين بعد منك هيناديني في وحدتي
حرموني حتى من الكفن
ولا أجمعك من فين لفين
طب لما أزور إبني اللي راح
دلوني فين هو اندفن
وسط الحيطان
اللي اترمت عند الجيران
تحت البيوت ؟؟
اللي انمحت ويا المكان
بتهون يا غزة
وقلبي ترجع ضحكته
ويا الولاد مع يوم جديد
ما العادة طفل بيتولد
ومعاه يكون مشروع شهيد
مع السلامة
وقلبي مقسوم حتتين
حتة بتباهي الخلايق
ان انا أم الشهيد
وحتة مكسورة جناح
بتنادي على إبني البعيد
ويا غزة برضه هتفضلي
تتعززي
على كل غاصب معتدي
وبتفرزي ……كل البشر
مين أصله خاين أو خسيس
مين دافع ابنه جوة ف ترابك
عريس
مين عزمه أصلب من جبل
شايل حمول
مين حط أعنف جيش وأهله
حتى انا …في حالة ذهول
مين باع ترابك والقضية
ومن زمان
مين حتى مستكتر عليك
لحظة أمان
لحظة أمل لحظة دفا
ترجع فتبني من جديد
خليك فاكرة لما تبني
إبني في ترابك شهيد
التعليقات مغلقة، ولكن تركبكس وبينغبكس مفتوحة.