على البساطة
بقلم .. أسـمـاء الـبـيـطـار
على البساطة كنا عايشين
و السلام امانه
و فلان بيسلم عليك من اجمل الكلمات اللي كانت بتخلي
القلب يطير من الفرح .
المناسبات اللي كانت بتجمع الصغير و الكبير .
البعيد و القُريب .
الود اللي كان موصول رغم بُعد المسافات
القلب اللي كان على القلب
التليفون اللي كان بييجي من بعيد
نلبس العباية و نجري علشان نرد من عند الجار اللي في رابع دور
الجار اللي كان زي اقرب قريب .
إحنا فين من كل ده دلوقتي ..
رغم سهولة كل حاجة مسافات و مواصلات و اتصالات .
الدنيا ما بتتغيرش هي هي زي ما هي .
بس الناس اتغيرت .
قلوبها و النفوس اللي بقت تشيل من اقل حاجة .
الفرح و الحزن اللي بقى الواجب فيه شئ عادي .
اقرب المناسبات لقلبك بتلاقيك واقف فيها بطولك و لوحدك .
ما بالك بالحزن اللي بتدور على فيه على قلب يطبطب عليك
بتلاقي الف عذر و عذر .
الدنيا بسيطة جداً بس مش عارفه ايه اللي وصلنا لكده .
تليفون واحد أو زيارة بسيطة
مناسبة حلوة فرصة نتجمع فيها و نعيد اللي كان و ننسى اللي فات .
و بلاش حكاية رنات دي .
و ما انا شايفك بخير على النت اهو .
التعليقات مغلقة.