على الماشي من الشارع
بـ قلم أسـمـاء الـبـيـطـار
بنيجي في فترات كده و نقوم الدُنيا و منقعدهاش و صور ماليا الميديا عن الفقر و الجوع و يا عيني الناس عفواً بتاكل من ” الزبالة ”
و طبعاً الصور مش هتكدب و فين المسئولين و فين و فين ؟؟!!
قبل ما تحكم على حاجة من صورة ،، من كلام ،، من مصدر غير موثوق فيه حاول تحقق بنفسك لأن الكلام ده سنُسئل عنه .
بنسمع كلنا و إحنا قاعدين في بيوتنا عربية بميكروفون يومياتي على الله تعدي و تنادي ” روبابيكيا ” أكيد ما فيش شارع فيكِ يا جمهورية مصر العربية ما سمعش المنادي ده حتى في أرقى الأحياء .
طيب حد سمع عن تاجر أسمه تاااجر خُردة .
لو حضرتك ما تعرفش أنا عندي خلفية كويسة جدا ًعن التاجر ده لأنه قريب ليا
التاجر ده بيجيلوا الناس بتاع الروبابيكيا اللي اتكلمنا عنهم و جايبين معاهم عربية محمله خيرات حضرتك آه و الله قرأتها صح خيرااااات
من علب معدن،، لكرتون ،، للبلاستيك،، لأمنيوم لنحاس،، لحديد
و يمكن لتلاجات و بتوجازات و كراسي آه و الله و كل حاجة ممكن حضرتك تتخيلها حتى الزجاج .
بيروح بتاع البيكيا للتاجر الكبير ده و كل حاجة من اللي ذكرناها بتنفصل لوحدها و تخيل بقى كل حاجة ليها تمن و بياخدها التاجر بالكيلو تمام كده ..
ندخل بقى في موضوعنا كـ العادة بعد المُقدمة الطويلة دي
الناس العادية و صدقني جزء منهم شباب عرفوا إن دي تجارة مُربحة جدا فبعض الشباب المُتعلم جاب موتوسيكل صُغير و بقى ينزل بالليل بعد المحلات في المناطق التجارية ما تقفل و يلم ورق الكرتون فقط و يبعها منه للتاجر مباشرةً .
اقولك الكيلو بالتقريب بكام ؟
كان على حد سمعي بـ ثلاثة عشر جنية حضرتك .
متخيل يعني لو الشاب الجميل ده لم عشرة عشرين كيلو هيعملوا كمان دا كرتون بس مش معادن و لا حاجة .
ففي ناس عرفت إن التجارة دي مُربحة جداً جداً جداً
فبدل ما تستنى لما المحلات تقفل بقت تلف على حاويات القمامة الكبيرة اللي في الشارع و يجيبوا عليها واطيها لأن إحنا قولنا كل حاجة بتمن و نزل للشغلانه دي رجاله و ستات وولاد .
و الناس تشوف المنظر يقولوا بيكلوا من عفواً الزبالة و هو دا اصلاً أكل عيشهم حضرتك .
يعني ..
بتاع روبابيكيا .. لحد بسيط بيلم بأيده من أي مصدر إلى تاجر خُردة
إلى أن يصل إلى مصنع تدوير المخلفات و دي صناعة كبيرة جداً جداً على مستوى العالم كله .
شوفتوا بقى أصل الحكاية إيه قرب علشان تشوف الصورة كويس
و ما تسوقش سمعة بلدك .
و الله ثم و الله البلد دي تستاهل كل حب لأن أرضها بناسها يستاهلوا كل خير .
التعليقات مغلقة.