“عمر ” بقلم الشاعر/ وحيد علي الجمال
كل مرة تبقى فيها جنب مني
يابن عمري بتعاتبني وتصارحني
ليه قساوتك سابقه عطفك
ليه بتمنع كتفي يبقى جنب كتفك
ليه حرمني من حنانك
ليه كاتبني وفي غيابك
وابقى عايش في انتظارك
ليه كاتبني في شهر صومك
ليه مصمم اني اصومك
رغم أن الفرض يابا
ارمي نفسي جوه حضنك
وابقى عايش جوه توبك
واملا انفاسك في صدري
انت اقرب حد ليه
كل مرة تقول عليه اني ضلك
وامتدادك اني شكلك
وفي حنانك وانفعالك
حتي واخد من جنانك
نفسي اعرف ليه بناتك
هما عندك اغلى مني
يابني حاسب
وانت واقف بتحاسبني
قبل ماانت تكون وتيجي
كنت أنا ولا حد غيري
اللي واقف ف انتظارك
كنت راسمك وف منامي
حد بيكمل شبابي
شايفه شايل حلم غالي
لسه رافض أنه يدخل
ف حساباتي
مش بخيل يابني ف حناني
د الحنان مخلوق عشاني
بس خايف لو سقيتك
تبقى جرعاتك زيادة
الملائكة يزيدوا واحد
والزمن محتاج ابالسه
مهما تاخد تبقى جاحد
نفسي بكرة لما تكبر
تقطع الطيبة الزيادة
اوعي تبقى القسوه طبعك
أو تعيش دور البلاده
نفسي اشوفك
تبقى حاجة زي جِدَّك
والمهابه تبقى حدك
ولا اقولك زي عمك
دمه معجون بالشهامه
ولا أقولك زي خالك
حبه ضلل فوق خالاتك
راضي ديما باللي جالك
تبقى نفسك اللي منك
يبقى أحسن حتى منك
ولا أقولك
تبقى أحسن من ده كله
تبقى حد من الصحابة
في الجلاله والمهابه
ينطق الحق بسلاسة
عنده جرعة من الحماسة
ضد أصحاب التعاسة
والخباثه والنجاسه
التعليقات مغلقة.