( عمي شلاطه…….)
علي قاسم مصر
عمى شلاطه نزل السوق
وجد القوطه زي التوت
بكام الحلوة قالت مكتوب
طاب ردي عليا هجيب دبدوب
قالتله أنا حلوة ولابسه الروب
ومهري أنا غالي
وجيبك فاض
وكل شويه عليا تفوت
طاب حني شويه رقي شويه
بكره ياحلوه الدنيا تروق
قالتله بتحلم
خدلك مشروب
بكره تلف ورايا دروب
وكفايه بقا هتجبلي ذنوب
عمي شلاطه عايز برقوق
أحمر وأصفر ف البوق يدوب
عيونه شرار
ولسانه مرار
نفسه يا ناس لو حته يدوق
قاله أنا شاري
وهدفع غالي
بدل القوطه راسها لفوق
عمي شلاطه لتكون مزنوق
اصحى وصحصح دأنا برقوق
والناس حواليا بتلف السوق
قاله بكام واكرمني يا ذوووق
قاله بعشره مِن غير ما تدوق
وهتدفع دمغه لو هتدوق
وبلاش تبصبص من تحت لفوق
قاله أنا ماشي وسايب السوق
دي عيشه هباب
وهرد الباب
بلاها كباب بلاها برقوق
وهغض عينيا بلاها ذنوب
راح أريح جسمي
وأغمض جفني
وأنسى أنا اسمي
في دنيا بتدبح ف المغلوب
في دنيا حاكمها قانون مخلوق
في دنيا السارق فيها محبوب
وابن البطه السوده مجذوب
التعليقات مغلقة.