عندي روح من ذوي الأحتياجات الخاصة
بـ قلم/ أسـمـاء الـبـيـطـار
أنا من الناس اللي كانت بتخاف جداً من أي فرو أو ريش أو ما شابهه
في يوم لقيت أبني بيقولي ماما واحد صاحبي مسافر و عنده قطة صُغيرة عاوز يسبها عندنا فترة سفرة ما عرفش إيه اللي خلاني أقوله خليه يجبها ؟!
أول ما جت كانت خايفه جداً، استخبت تحت كرسي السفرة لحد ما هديت
و أنا مش من طبعي بصراحة إني اعافر لحد ما أي من كان
إنه ييجي رغماً عنه ، لما ييجي لحد عندي يبقى خلاص مرتاح إنه يتقدم و لو بخطى ثقيلة المهم إن هو من يتقدم و دي على فكرة نقطة مهمة جداً في أستمرار العلاقات .
أن من يأتي لك يأتي و هو مقتنع لا و هو مرغم .
كنا بنقول ايه آه القطة لما هديت طلعت لوحدها و بدأت تتعرف علينا واحد واحد بحاسة الشم طبعاً و دي كانت أو مره في حياتي أتعامل مع حيوان أليف عن قرب .
مش عوزة أقول لكم اتعلقت بيها أد إيه ،، و بصراحة صاحب أبني استأذن إنه يسبها عندي لأنه مش هيقدر يراعيها .
فرحت بيها لأنها كانت شئ جديد في البيت طبعاً بعد ما أولادي كبروا .
كانت و ما زالت روح طفلة من ذوي الأحتياجات الخاصة
سريعة التعلم و الفهم
تفرح،، و تحزن ،، و تغضب ،، و تنفخ إذا ضايقها أحد
تنعزل إذا شعرت بالضيق و تنام بالساعات
تتعامل معك بقدر تعاملك معها .
يعني في من ولادي بيهزر معها برفق فتتعامل برفق
و منهم من يشاكسها و يتشاقي معها فتفعل مثلما يفعل
و الأغرب عندما تخاف تجري على أكتر واحد في البيت تشعر معه بالأمان .
ليها نفس و مزاج في الأكل و استحاله ترغمها علي شئ تاكله زي ولادي بالظبط .
لما بتجوع ساعة الفجرية بتخبط لي على باب الأوضة و طبعاً أنا فاهمة هي عوزة إيه .
رووووح .. بكل ما تحمل الكلمة من معاني
محتاجة كل شئ ممكن تتخيله من اللي إحنا كبشر بنحتاجه
من حب، و رعاية ، و إهتمام، وود، و صبر و ضع فوق كل هذا إنها من ذوي الأحتياجات الخااااصة جداً جداً .
الموضوع دا كله ليييه و إيه ده معقول هنكتب أو هنقرأ مقال عن قطط
صدقني و أنا علي يقين إن اللي مربيين الكائنات دي فاهمين كويس أنا بقول إيه و مقدرينه كويس جداً .
لأن في الفترة الأخيرة دي القطط تربية البيوت كتروا جداً جداً في الشوارع !!
شكلهم باين عليه و معروفين طبعاً
حالة الخوف و الزعر اللي هما فيها بتقطع القلب
حالهم حقيقي يصعب غير طبعاً الأذية اللي بتتعرض لها من بعض البشر و من بني جنسها ؟
حقيقي يا جماعة الأرواح دي مش لعبة ،، و مش للتسلية
و مش لما تزهق منها تقوم ترميها بكل قلب بارد في الشارع لأن حقيقي مصيرها الموت اليوم أو غداً .
مش هتقدر تحافظ على روح بكل معنى الكلمة من فضلك بلاش تاخد ذنبها .
عن نفسي القطة اللي عندي بعاملها زي أولادي بدون مُبالغة
و تخيل أن لك طفل من ذوي الأحتياجات الخاصة .
الراحمون يرحمهم الرحمن .
التعليقات مغلقة.