عيب اختشي ما يصحش كُل نونو نونو
أسـمـاء الـبـيـطـار
كتير من الكلمات البسيطة اللي اختفت من قاموس تربيتنا للأطفال
و كتير من الأمهات بتشكي من سلوك اطفالها و للأسف في مرحلة مُبكرة جدا يمكن قبل دخول المدرسة
بتشكي من الردود و التطاول باليد و بالألفاظ و حاجات كتير الواحد بقى يستغرب لما بيشوفها .
الطفل ده زي ما قولنا انتي اللي بتبنيه من الأساس إلى ما شاء الله .
فمش معقول تعوديه يندهلك بأسمك أو باسم الدلع بتاعك و ما تقوليش عيب أو ينادي باباه بأسمه و يضحك
أو تسمحيلوا يقولك انتي و تسكتي بحجة انه صُغير
أو اول فرحتك أو علشان ولد على البنات أو بنت وحيده على الولاد
وله تعاقبيه فيرد لكِ العقاب سواء بالضرب أو باللفظ
و كل ده من غير كلمة ردع واحدة من غير كلمة عيب و اختشي
كل ده حضرتك بيبني سلوك الطفل و اول نتيجة بتبان على حضرتك .
لما هتوصلي لمرحلة انك هتتكسفي تخرجي بيه و يقعد وسط تجمع و لو حتى عائلي .
طريقة ابنك حتى في الأكل انتي مسؤولة عنها
ابنك مرايا لبيتك لأسلوبك و سلوكك معاه في ادق التفاصيل اللي ممكن تتخيليها .
فصعب تفصلي بين البيت و المجتمع الخارجي ايا كان .
ما فيش حاجة اسمها يعمل في البيت اللي هو عوزه و بره عوزاه يبقى محترم مش هينفع يا ست الكل
إحنا اتربينا على كلمة ماما
عم فلان و خاله فلانه
ناكل ما نملاش بقنا علشان عيب ناكُل نونو نونو
و إحنا بناكل الفراخ أو اللحمة لازم نبص لأتجاه خيوط اللحمة
علشان ما يبقاش شكلنا وحش بتبقى الحاجة مستوية و مُجرد انك تقطعها غلط بيبقى المنظر مش حلو أو فيه احراج
عودي ولادك بعد ما يخلصوا اكل يقولوا الحمد لله ماما شكراً
عوديهم يقولوا رأيهم في الأكل مش على الطبيلة أو السفرة بعد ما يخلصوا اكل يقولوا ايه كان حلو و ايه مش عاجبهم بذوق و بأدب .
لأن ده مردوده فيما بعد .
مش بقولك ادق تفاصيل ممكن تتخيليها حضرتك مسؤولة عنها
ما توصليش ابنك لمرحلة انتي يا ست انتي
و نرجع نتهم جيل إنه مش متربي .
نبدأ من البيت هنلاقي المجتمع مُتحضر .
التعليقات مغلقة.