عيدان كبريت شعر / وحيد علي الجمال
أنا امبارح مشيت نايم
وطيرت كمان وانا عايم
ولما الجوع عَصَر بطني
كدبت وقلت أنا صايم
لا أنا ساحر ولا مجنون
ولا شارب تقول مسطول
وابعد مما تتخيل
عن الكرامات
انا حتى كمان مديون
وحرفي إن طلع مني
عليه مسؤول
أنا لسه مجاش زمني
ومش مكتوبه أيامي
في أي فصول
ومنشوره قصايدي هناك
ومصلوبه كدا بالطول
سليم القصد والنيه
مانيش مهبول
سألت الناس على حظي
قالوا حظك يا واد مقتول
وكان سايب هنا وصيه
وشنطه فيها جِنِّيَه
وحلم كبير بيتمرجح
مابين الشط والميه
وصُوَّرُه كتير بتشبهلك
ومجموعة من التجاعيد
وجرح قديم وكام كلمة
وشِعر حزين من الماضي
ونار طارحة على عينيها
عيدان كبريت
وتعويذة بتحكي غربتك فيها
وملفوفه كما العفريت
ومكتوبلك على الهامش
بلاش تبقى على الهامش
في قلب حبيب
يا تبقى كل أحلامه
يا إما تغيب
ولو جرحك لمس قلبه
بسرعه يطيب
حذاري ياواد يكون بينكم
حدود وسدود
حذاري يكون مابينكم كسر
مافيش في الدنيا حب يدوم
في قلب قلوب شرخها الكسر
التعليقات مغلقة.