ع الرف شعر جيهان النجار

*ألبوم صور على رف
مجمع الأحباب
كل ساعات الفرح
لقطات تخبي عذاب

*ألبوم شايل أسئلة
عن عمر كام لقطة
بلمعة الفساتين
وبريق عيون صامتة
بتفكر الناسيين
الذكريات أنقى

*صور اللي مات
أحزان
صور اللي فات
ألوان
لون الصور مبهجة
لون الزمن بهتان
كان عندى عشرين
سنة!!!
اااااه …….لو تعود يازمان .

*أبويا متصور
نازل فى فرحي
رقص
رقصة طاوس …..مهوس
يبكى دموع الطرح
والجدة متحزمة
بطرحة م الاصلي
ملفوفة على وسطها
تغني بكمال وصفي
وخالتي من ضحكها
قالو اكيد بنتها
والفرحة سيعها
دى حتى أهيه شكلها
ع الخد غمازتين
مين اللى زيه مين
يابخته طال السما
وناسب الحلوين
*اصل ….

و…..الصور
……لقطات

*بعد الفرح شفرات
وصورة متبروزة
ع الحيط ومتعلقة
مخنوقة من حملها
وكل يوم بيمر
ننسى ملامحها
ولما داب حبلها
وقعت على وشها
ما حد صلحها
محطوطة ..
…..فوق ع الرف.