غاوي فقر كلمات أبومازن عبد الكافي
فاكرين زمان
أجمل وليمة
عودين سِرِيسْ
وشُقِّتين وملفوفين
مع راس بصل
مع خرطِةْ
الجبنة القديمة
في الغيط تجيبهم بنتنا
مع قُلة المَيَّة الفَخِيمَة
ناكل ونحمد ربِّنا
وِنْبوس إدينا
ونقول يديمها ربنا
نعمة .. ويحفظها علينا
بَرَّاد كبيرللشاي معانا
علَى رَكْيِةِ النَّار في الشِّتا
لُهْ طعم تاني ف بُقِّنا
وبيِحْلَى لِينا
نتلم في الشموسة
ساعة الراحة نتوضَّا
ونصلي فرض ربنا
الغالي علينا
كانت حياتنا طيبة
وكان لينا قيمة
كنا نحب بعضنا
وقلوبنا من جوة سليمة
وجيوبنا كات فاضية
لكن بالحب ..
كان الخير مالينا
قلوبنا مليانة حنان
و بيوتنا عمرانة
وبيحُوطْها الأمان
وعشيتنا
كات حلوة وكريمة
كنا نحس في الشتا
رغم البرودة .. بالدفا
باللمة في القوضة
اللي كانت م الشتا
بتنقع علينا
ننام على صوت الوبور
ومن الدفا نغمض عنينا
ننعس ونحلم بالأمل
بكرة يجينا
لكن يا حسرة
للأسف صحينا
على كابوس
نفوس ياصاحبي
غير النفوس
الكل بجري ورا الفلوس
وبقينا على بعض ندوس
وقلوبنا صارت قاسية
ماتقولشي حجر!!
والكل ماشي عليه غضب
ووشه غطاه الضجر
وبقينا نحسد بعضنا
والغل ماحي الحب فينا
وكل واحد مننا
عاوز يكون رُبَّان سفينة
وعلى هواه يِحكُم
ويتحكم بأمره ويِئذي فينا
قطعنا أرحامنا ..
وقفلنا باب الود
والرحمة ما بينا
وبقت ليالينا حزينة
وبِعِدنا عن نور ربنا
وتركنا هَدْيْ المصطفى
أحمد نبينا
علشان كده
رغم التقدم والرخاء
وتكنولوجيا وعولمة
حاسين بعيشة
صعبة .. ضنك
والدنيا باينة مضلمة
من الغلا ومن البلا
والوبا اتسلط علينا
لازم نغير نفسنا
ونعود لرب الكون بارينا
وكل ليل بعديه نهار
لازم نفوق .. ناخد قرار
لازم نصحح المسار
رب العباد عالم بحالنا
نسأله سامع سؤالنا
وأكيد هيفرجها علينا
و تتعدل دفة حياتنا
والأمل نحييه مابينا
عشان يجينا
عبد الكافي فاروق عبدالكافي بدوي .
الإثنين 20/12/2021m
التعليقات مغلقة.