غدر النسيم…شعر معاوية كيلاني المهدي

منظر بديييع

الخلق بيشموا النسيم
والورد سكران بالربيع
والبحر ساكت منتبه
كما طفل مستسلم وديع
أجواء جميلة ومبهجة
والفرحة في الخلفية عايمة
ولمون بيضحك بالدموع
على كوم نساير رنجة نايمة
صوت البصل
في البق بيطقطق قوي
والبيض ملون
معظم الألوان موايمة
منظر جميل
وكأنه هربان من مشاكله
شفت الجميع بره الهموم
فارشين ، بياكلوا
وأنا روحي .. حايمة
حيرانة روحي بترتجف
حسيتها رغم الأكل
صايمة !

فجأة انتبهت
على صوت لحزن بيندلق

مسحور ، وجنية ، وقلق
ومكان غويط في البحر
مشهور بالغرق
ومراكبي حيران من زمان
غطسان في قلب البحر
مبلول بالوجع
يطلع لحد البر يغرق بالعرق

مسحور ، وجنية ، وشبح
وعيال بتبكي بحرقة
والصوت اتنبح
عيل غرق مبلوع في بير
والناس كتير
واقفين يادوبك بالسبح
وأبوه جابوه واقف عفي
وسمعت قلبه بيندبح
والبحر مستهبل لئيم
مستني آخر مقترح
الواد غرق
مع إنه كان جاي للنسيم
بالبيض ملون وبحاجات
الواد مرتب .. للفرح !

مسحور ، وجنية ، وحياة
والآه بتدبح
قلب أم مفرهدة ف كل اتجاه
إزاي يا بحر تقربع العيل شقاك
دا الواد بريء
جاي لك ، وهربان من شقاه
مشهد درامي
كادر دامي ، حزين ، عنيف
الصورة باهتة ، وصوت ضعيف
والخوف مسيطر
من بدايته لمنتهاه !

مسحور ، وجنية ، وعيال
والحزن متمطع قصادهم
ع الرمال
والبحر صادهم
بالنسيم الطعم
وطقوس الاحتفال
مشهد زمان شفناه
على شط الوجع
لما الجدع
نكد على الفرحة العيالي
غطسان ما قبش
مع إنه كان عامل مخربش
وإنه عدى المانش
والبحر الشمالي
أنا بانفعالي
ما قدرتش اتحرك ، جمدت
أنا كنت سامع قلبي
بيدقدق صحيح
بس بصراحة
لما شفت الفرحة ماتت
قمت …. مُتْ !

مشهد فظييييع !
.
.
.