” غزه ف ليل الشتا ” شعر/ السيد الشيتى
ياغزه ليل الشتا
فاكر اراضيكى
غَرَّق خيامك بُكا
قصده يعزيكى
والبرد شافك بكى
ليله بيطويكى
يبكى ودموع الأسى
نازله تواسيكى
يبكى على غربتك
واللى جرى ليكى
ينعى ضمير الأمم
اللي بتنعيكى
سابوا كلاب العدو
تنهش ف باقيكى
هدموا جمال جنتك
خنقوا الحياه فيكى
هجر الأمان دنيتك
والأمن ناسيكى
فرش الركام سكتك
والحزن ف عنيكى
سرق العدو بهجتك
وبناره يسقيكى
حاضنه نيران العدو
والموت يناديكي
وسماكى هى الغطا
لكى رب يحميكى
قلب اليهودى حجر
يتمنى يمحيكى
قلبك ياغزه انجرح
دبحوا لياليكى
نَسّوكى طعم الفرح
والنوم مجافيكى
خلوا جحيم السما
يهدم مبانيكى
ينسف بيبان دنيتك
يقتل اهاليكى
صبرك ياغزه شجر
ظله رحيم بيكى
ولاعمره شاب وانهزم
ينده يلاقيكى
يادنيا لسه بتشجبى
ومكتفيه ايديكى
شايفه الحقيقه وتكذبى
والرعب ماليكى
يادنيا مره اغضبى
ع ال افترى فيكى
صُبى جحيم ثورتك
على مين يعاديكى
ولّا الجبان القوى
هو ال يرضيكى
ياغزه عين الزمن
شايفه الأمل بيكى
النصر نور سكتك
والصبر يحْييكى
نصبوا كمين عزلتك
كتروا اعاديكى
والدنيا ايدها بترتعش
خوفها يبَكّيكى
ابنك ياغزه حِلف
بالدم يفديكى
وتكون حياته تمن
عزك وماضيكى
يتباهى بيكى الزمن
والعزه تاج ليكى
التعليقات مغلقة.