غلطة العمر بقلم أسـمـاء الـبـيـطـار
كتير مننا بيضيع جزء كبير من عُمره و هو مركز
أيوه مركز على هدف واحد في حياته !
_ عاوز يكبر و خلاص و بيضيع منه أجمل سنين عُمره !
داخل ثانوية عامة عينه على كلية واحدة فقط لا غير ! عاوز يخلص تعليم و يسافر فين و إزاي مش مهم !
_ بتحب فلان رغم كل ما فيه ، و مش شايفة غيره !
_ عايش حياتك علشان حد بعينه يرضى عليك !
_ عايش حياتك كلها للي حواليك و ناسي نفسك !
_ عاوزة تتزوج و تخرج من بيت أبيها و السلام !
_ عاوز تثبت إنك مش زي ما هما فاكرين !
و عاوز ، داخل ، عااايش و و و و
و ممكن نتهد قبل ما نقول يا هادي لمجرد إن الهدف اللي حاطين عنينا عليه متحققش ؟!
أو نندم على عُمر عدي علشان ما شفوناش زي ما إحنا عاوزين ؟!
و ف الوقت اللي فكرنا فيه بالطريقة دي ، كتير من الحاجات الحلوة راحت مننا ، ما شوفنهاش ، أو دوسنا عليها !
كتير من إمكانياتنا و قدراتنا و طاقتنا راحت في سكة غلط .
و بنقف تايهين ، و بناخد وقت عقبال ما بنرتب دماغنا من أول و جديد و كل دا من عُمرنا القصير جداً مهما طال .
علشان تعيش في الدُنيا دي صح لازم يبقى ليك أكتر من هدف
لازم تكون إنسان مؤمن بقدراتك ، و موزع مجهودك اللي لازم يبقى ليك نصيب شخصي منه .
لازم تبقى حياتك زي سلم البيت تطلع خطوة خطوة ، و لو عالي شوية أقف و خد نفسك و إرجع كمل علشان توصل سليم و نفسك مش مقطوع و تقع من طولك .
و مش عيب إن يبقى ليك أكتر من هدف
و بصراحة ما بحبش منظر النملة و هي ماشية ووراها جيش من النمل علشان تشيل حبة سكر ، و يمكن في الأخر تطلع حبة ملح ؟!
الحياة فيها حاجات كتير لازم نشوفها بعين العقل مش بجمود العقل .
التعليقات مغلقة.