فاض الكيل …بقلم وحيد علي الجمال
تعرفي سر خلافنا الأزلي
اللي هيفضل واخدك مني
إنك عايشة شكوك الماضي
رافضة تشوفي منه بواقي
عامله عداوة معاه من بابه
مع سكانه و حتى جيرانه
اتحولوا وبقدرة قادر
داخل ظنك من أعدائك
وبتفرضي كردون على قلبي
فاكرة بخوفك كده بتحافظي
ناسية الحاضر سيباه فاضي
وقت ماكان مكسور وبينزف
هديتي باقي حيطان المعبد
بس حاولت أضمك واهرب
من وسواس الظن القهري
أيوه فشلت ومش متأسف
أيوة فشلت بكل جدارة
اطبع صورتي جوه مرايتك
واعمل من أشعاري ستارة
تمنع نار الهجر المرعب
كنت مكركب مش مترتب
كنت بحاول أمشي المركب
كنت واهبلك كل مشاعري
كانت رهن رضاكي بتبكي
كنت شايفها في بحر عنادك
عمالة تهرب رافضة تقرب
جوه شقوق الماضي المظلم
و بتتسرسب فوق أوجاعنا
بتغيّر في جمال المعني
انا بتبرأ من أوهامك
مش هفضل واقف متفرج
ودا تهديد واضح وصريح
مش تهريج
فاض الكيل و الصبر هيخلص
حتى سكوتي مابقاش ينفع
غضبي إن عدى حدود المنطق
مش هتجمل ولا هتحمل
أي ضريبة لسوء تقديرك
أنا اعذرتك أنا أنذرتك
أي خساير بعد قصيدتي
مش هتحمل أي نتيجة
التعليقات مغلقة.