فاعل وفواعلى .بقلم.اشرف الشناوى
انا شغلى فاعل وفواعلى
من غير تكييف
والا قولت مره انا مش طالع
برا التصنيف
ريحة العرق هى حياتى
ومرهم تلطيف
واحلم على قدى وحلمى
من غير تكاليف
واشبع بلقمه ومن تعبى
لو نص رغيف
وانام وانا خالى وقلبى
ابيض ونضيف
واضحك ساعات وساعات
بابكى من غير تكليف
صريح وماكدبش والاوع
والا اعيش تزييف
ولو هاموت م الجوع مانكر
لو نص جميل
ولا عمرى هاشكى انا من تعبى
لو حملى تقيل
وهاكمل المشوار واقف
من غير مااميل
انا شغلى فاعل وفواعلى
وباحط واشيل
واغنى من تعبى وباعشق
لون المواويل
ولا مره هزمتنى الدنيا
ولا كنت عويل
وادوس على الصعب واعدى
لو كان اساطيل
وروحى تكسر احزانى
وبمية ازميل
وأرضى هابدرها امانى
على ريحة النيل
ياقلبى ياساقيه ودايره
تملا الحواويل
ابدر امل وفى ترابيعها
نور قناديل
انا شغلى فاعل وفواعلى
وباحط واشيل
التعليقات مغلقة.