فاكرينها حلال… شيماء عادل

ولا عمرك عديت من عمرك
فايت قد ايه
وجمعت الباقي اللي مقدر
وف علم الغيب
اطرح منهم ايام الفرح المنهوبه
و الضحكه الباهته السكرانه
اللي بتلمع ف وشوش الكل
والكل مصدق لمعتها
و فاكرينها حلال
ضحكه ومسروقه من الدنيا
انا بسرح بالضحكة ف نفسي
وراضي ومبسوط
وتملي بفضل اكون ف سكوت
بعمل سيرش
وبرفض كل الاختيارات
ورصيدي محاصر كله آهات
وبفكر في الخطوه الجايه
هتعدي ازاي
وازاي العمر الباقي معاك
هيكون وياك
بتغير وبغير
وانا وانت لكل الكون رافضين
والكون ويانا بجبروته
هيسيبنا ازاي
البعد محال
وانا قلبي بيسأل قلبي عليك
دايما مظلوم
من كل الناس
قلبي الغيران دايما مهجور
والكل عليه دايما بيجور
من غير اعذار
والناتج عندي تملي اصفار