فتش عن الحب… شعر السيد الشيتى
فتش عن الحب ف زمانك
مين عشانك ضحى يوم
مين ال لو شاف حد هانك
استحاله يجى له نوم
مين ال من خوفه عليك
أن غبت يتألم
مين ال لما يشوف عنيك
قلبه ال بيسلم
لو تحَكِّم بس قلبك
خوفى تهلك
خلى عقلك يلهمك
مين ال يستهلك
فتش بقلبك عن مكانك
مين عشانك حس بيك
هتلاقى قلب بيكرهك
والف قلب يخاف عليك
قلب ال يكره حجر
قاسى ماعمره يلين
ناسى أن طبع البشر
رحمه وشوق وحنين
قلب المنافق يهدمك
لو قيدت له صوابعك شموع
يتمنى م النور يحرمك
ويخلى ايامك دموع
قلب ال حبك يسعدك
وتحس وياه بالامان
ف الشده دايماً يسندك
وتلاقي فى قلبه مكان
لو زاد عليك موج الزمن
يصعب عليه يسيبك بتغرق
لو كدبك كل البشر
قلبه يسمع لك يصدق
قلب المحب يخاف عليك
ويحس بيك من غير كلام
ف الشده بيطبطب عليك
ويشيل معاك حمل الالام
التعليقات مغلقة.