فرد حمام…
اشرف الشناوى
……..فرد حمام……..
فرد حمام أخضر زغلول
عمال يحوم حوالين الدار
فتحت له شباك قلبى
سقيته فى الميه موردى
وعملت له عشين عندى
ورميت له من زرعة قمحى
حفنين عليهم رز شعير
كبر الحمام غير ريشه
يطير يلقط كدا عيشه
ياحمام بلاش تبعد عنى
واياك تولف عند غريب
وتسيبنى وحدى مع غنايا
وعقلى ياخد كدا ويجيب
دا انا قلبى عاشق موالك
ماتقولى ايه غير حالك
وإلا أنت شبعان حنيه
وسايبنى ليه فى الليل حيران
انادى مش سامع خلى
ياحمام تعالى انا ليك غلطان
واتدارى م المطره فى ضلى
دا انا قلبى بيتك والغيه
نقعد ونشبع ملاغيه
لحد مالصبح يشقشق
نسمع كدا اجمل حواديت
ياحمام تعالى بلاش تمشى
وتسيبنى بين جرح واوهام
من يوم ماروحت أنا قلبى حزين
ولا عدش بيطرح عود ياسمين
حتى الوجع أصبح فدادين
ازاى هاعيش ماتقول بعدك
وانا قلبى دايب من بعدك
بس افتكر ياحمام وعدك
انك هتفضل ليا حبيب
مهما الزمان فرق بينا
فمسيره يرجع
اى غريب ……………..
اشرف الشناوى
شاعر عاميه
البرامون
المنصوره
التعليقات مغلقة.