فضفضة من القلب
بقلم سنيةأبوالنصر
صباح الخير
كل سنة وحضراتكم بكل خير يارب…
رمضان خلاص علي الأبواب… يدوب تلم نفسك وتفتح صفحة جديدة مع ربنا…
والله حاجات بسيطة خالص صدقني … بس اقسم بالله بتظبط لك الدنيا كلها…
تقدر من دلوقتي تعمل لنفسك ورد يومي تحدده انت بمزاجك وعلي حسب ظروفك ووقتك…
ورد قرأن مع ورد ذكر كل يوم الصبح قبل ماتمسك الموبيل… بيظبط لك اليوم كله
خلي بالك قبل ماتمسك الموبيل لانك لو مسكته انسي… وياريتك تهجره شوية يكون احسن …
اعمل جامع وخلوه… في غرفتك سجادة صلاة علي جنب كدا… عليها سبحة ومصحف وفي نيتك هي خلوه مع الله تقفل فيها دماغك وعنيك عن الدنيا باللي فيها …
كل ماتصلي فرض اقرا بس ربع قرأن…ورقة ونص مش هتاخد منك دققتين… علي اخر الشهر هتلاقي نفسك ختمة القرأن من غير ماتحس مش صعبه بس اختشي من ربنا بقي وابدأ…
اجتهد مهما كانت اخطأك أن الله غفوراً رحيم.. وبيستر عليك ومستنيك… طول ماربنا بيستر عليك… اعرف أنه لسه بيحبك…
أوعي يفوتك القطر وتلاقي نفسك في أخر محطة وساعتها خلاص لأن أخر محطة مش هتلاقي ربنا هناك…
ربنا بيحبك اكتر من حبك لأولادك… وانت عارف دا…
هتلاقيها في رحمته بك… لما يسخر لك ناس تذكرك بربنا علشان يقربك له… بيقولك تعالي
لما يسترها عليك وعلي اولادك وبيتك ويخليك أفضل من ناس كتير اقل منك… بص حواليك
اصل كدا كدا الحياة هتخلص… وكدا كدا هننزل من القطر… وكل واحد معاه شنطته… الموت علينا حق… ولقاء ربنا دا احلي لقاء للعبد المحب لله…
في أيات في القرأن كلها رحمة ومغفرة… تحس انها لك انت لوحدك وكأنها نزلت علشانك …
دور علي نفسك في المصحف هتلاقي نفسك جواه…
والأية اللي تحس نفسك فيها اكتبها في ورقة وخليها قدام عينك…
مش عيب اننا نغلط… لكن العيب اننا نتمدا في الغلط… واوعي تكون قدوة سيئة لأولادك هيقلدوك… وهيورثوا منك عيوبك من غير قصد …
اصلا هتنصح ازاي أولادك بشئ انت اصلا مقصر في…
في ورد ساحر قريت عنه كتير وجربته كتير واقسم بالله بيحي القلب فعلا…
انا كل ماابعد عن حضن ربنا الجأ للذكر دا…
لا اله الا الله وحده لا شريك له له الملك وله الحمد وهو علي كل شئً قدير… او اكتفي بلا اله الاالله… اي صيغة بس ابدء
قولو.. وانت في طريقك للشغل وانت راكب عربيتك…. وانت لوحدك ولو خمس دقايق كل ساعة
قوليه… وانت بتروقي بيتك وانت بتطبخي… وانت في شغلك وانت حتي ماشيه في الشارع…
ربع ساعة خمس دقايق اي حاجة… انت واجتهادك…
لسانك هيحب الذكر وهتلاقيك من غير ماتشعري لسانك بيذكر لوحده…
الذكر دا بيحي القلب وبيقربك لسجادت الصلاة وبيفتحلك ابواب العبادات كلها… وكل مااكثرت في… كل ماهتلاقي نفسك بتعمل كل حاجة ربنا بيحبها…
قول لا اله الا الله وحده لا شريك له الملك وله الحمد وهو علي كل شئ قدير … دا مكسبك النهاردة… قبل ماتغرق…
التعليقات مغلقة.