فكرتك موسى…
بقلم أشرف الشناوي
……… فكرتك موسى…..
بهدوء
من غير شوشره
رجعلي القلب
اللي انت اخدته
سليم…
كان أخضر
زى الفل
وزاد في خضاره
عن البرسيم..
كان فاضي
مايعرف حب
وهجر وقلة قيمه
وشغل حريم…
من فضلك
قوم رجعلي
الروح اللي انت
شويتها
في قلب جحيم…
ورسمت الصبح
وخدت الفجر
وسيبت القلب
لوحده حزين…
صدقتك
لما لقيتك واقف
وسط الناس
مسكين…
لما اتمكنت
طلعت حويط
ومن الملاعين…
رجعلي في قلبي
الضحكه اللي انت
خاطفها سنين…
فكرتك موسى
طلعت من الفراعين…
واتاريك زنزانه
بسور وحراسه
وقلب مافهش حنين….
وفتحت القلب
لقيتك عمال تقطف
في الياسمين…
وتدق الجرح
في قلب الروح
وتبهدل فيا كما
وتهين…
انا كنت سعيد جدا
من غيرك
وانت بعيد…..
قربت نسيت
الفرحه وطعم العيد….
وبابص لقيتك
زى كلبش
في أيدي حديد…
مستني الحكم
يااما براءه
يابالتقييد…
من فضلك
هاتلى القلب
اللي انت اخدته
بوضع الايد …………
اشرف الشناوي
شاعر عاميه
البرامون
المنصوره
التعليقات مغلقة.