فكرتني…
بقلم حسن أبوعرب
فكرتني
فكرتني بريحة المطر
بالصحبه وليالي القمر
وحاجات كتير
فكرتني ببيتنا الكبير
والشمس طله تبتسم
والتوب حرير
فكرتني بصوت البلابل
ع الشجر
بالشقشقه والزقزقه
والقلب طير
فكرتني بِابن البلد
في الشِده
والوقت الخطير
فكرتني بالحب
وايام الصِبا
زمن البراءَه
والطهاره والضمير
بالذكريات
وحبيبه م الزمن اللي فات
فى عنيا كات زينة البنات
كانت أميرتي وانا الأمير
ياضحكه صافيه منوره
يالَمه جِوه المندره
الست سومه مسَهرَه
عبر الأثير
عمك صيام
جامع حبايبه وصُحبِتُه
لجل الفطار
رفعت بصوته ونبرِتُه
النقشبندي بفرقته
رمضان بيحلى بلمِتُه
والخير كتير
فكرتني بالطيبين المخلصين
ناسنا اللي رحلُوا من سنين
والخير معاهم قد رحل
الستر كان المُبتغَى
لو لُقمه حاف
فيها الرضا منتز
والخيش غطاهم والحصِير
ياكل خاين غير أمين
باعنا فى سوق النخاسين
ليه الجفا والحب معناه الوفا
هو الدفا هو الحنين
ربك دا عالم بالبشر
هو البصير لينا نصير
ياناي ليه عزفك صار حزين
يانبرة الصوت الدفين
رايحين لفين
ابكي وبَكي العاشقين
بلدك وريحتك طميَهَا
انت ضناها ونبتها
ابن حشاها وبطنها
للقمح تشبه والشعير
حب البلد دي كلها
احفظ ترابها وعرضها
سنتها يبني وفرضها
خليك دعامه لسعدها
مش من معاوِل هدمَهَا
لبي الندا وقت النَفير..
التعليقات مغلقة.