فنكوش …بقلم وحيد علي الجمال

وبعد الفرض والسنة نويت الصوم
ووقت النذر متأخر وكان لازم سداد الدين
مافيش غفران هيمسح صدمة الخذلان
ولو كانت دموع العين
حبال الوصل مقطوعة وواقف دمي متحجر . ؟! ونفس الجرح يتبرر
أثور وأغضب اتوب وأرجع
وقول أنه انفعال لحظي
ونية قلبي كان رافض يمين البعد
والهجران فيبقى لغو مش اكتر
وليه ديما نشيل ذنبه
وهو الموت صدر ضده ؟!
واكرام اللي مات دافنه
ولا تغوصي في أسبابه
لا عمره شغل بالي
ولا مره هزور قبره
عامل ازعاج لاشعاري وكاسر بحر اوزاني .
وسارق قفلة القافيه
إذا مرة غلط قلبي وجاب سيرته
أبات زعلان ومتأزي ولا يمكن اعيده تاني
في الجره
خرابه كبيرة م الاحلام معاها كتير من الاسرار وكام جرح اتفقل بدري
وحب قديم كدا شوية عديم الفايدة ومصدي
وكام اعجاب وتنهيده شريط مركون
لي عمرو دياب ومزيكا
وصورة لسه مرسومه علي الشباك
وملفوفه في طرف حجاب
قصيدة واخده تأبيده ومحفورة
ومشبوكه في صرخة روح
وصوت طالع بتسبيحه وفنجان قهوة
على الريحه وصفحه قديمة مقلوبه
ومركونه في قلب كتاب
بلف في دايرة عريانه وسحباني
على الماضي وبالشقلوب
عينيه فيها معصوبه بتشبه واقفة السكران
خسرت كتير معاكي زمان
ودلوقتي بقيت بخسر كدا ادمان
ومش معنى وجودي في قبلتك
اني هسيب الذنب يغفرلي ويعلن أنه تاب فيكي وعمر الشعر في عينيكي
ماكان تعويذه تقريها على مجنون
وقع فيكي
انا لونت ايامي بلون الهجر
ومش هدفع غرامة وزن
ولو كان الكفن بفلوس هصرحلك ببيع النعش
وهعملك حوار غامض تقولي فيه سبب موتك
في أشعاري يكون واضح مهش فنكوش