فوق الضفاف ج2 بقلم.. مسعد البحراوي
زي عادتي
لما قمت الصبح بدري
كل صبح بييجي
أفتح للحياة شباك أمل…
شلت حاجتي واتكلت على الوكيل
مافي شئ كان مستحيل
وانا وارث شط نيل
من زمن والجد أحمس …
ياله ترمس
قربي يامدام وقرب
ياللي عاشق ياللي مفلس
النهارده البيع محبه
كله ياخد مني حبه
بس شرط يكون بيعشق
والجبين مكتوب عليه
ضحكه صافيه وقلب مخلص ..
ياله ترمس
قابلت شخص جميل
فوق من عيونه الليل
عمال يقول مواويل
من غير مايتنفس
قال هات عشان أنسى
نبض الهوى المجروح
دا مفيش عقول لسه
تفهم معاني البوح
فين ناس بنا حاسه
كانت بتبني الروح
تُشكر عيون ناعسه
سابت الكتاب مفتوح
لساها بتحسس
واتمخمضت شعراء
بإديا روحت عليه
رَوّق يابيه رَوّق
وبصَمّْتك اتزوق
حكيك بيلقى غباء ..
قاصد تقول ياعني !
الدنيا مش أفلام
بتهين معاني الحب.
و الحب لو إجرام
و ضد درب الرب
نبضه يكون أخرس
اسكت وكُلْ ترمس
ترمس يابيه يامدام
قابلت شخص كمان
ولقيته قال لي يامان
حسيت معاك بأمان
قِدر الشعور يلمس
إنده وقول ترمس .
طلعت لي سنيوره
في إديها نشاشه
وبمشي غندوره
ولا نجمه ع الشاشه …
قالت لي يابن الآه
قولت لها أُو ٓ لَّا لَّا ٓ
عطرك دا يامحلاه
يازهره كلك ذوق
جايه ف زمن مسروق
وف دنيا كدابه
يامهره متسابه
وانا قلبي كله شروق
بوضوحه متأسس
خلاني ابيع ترمس
أرجوكي تتواضعي
وتقدري وضعي
لو تقرأي مراجعي
تلقي الزمن مفلس
يامدام يابيه ترمس ..
انا روح عجوز في غلام
بخاف أعيشها حرام
وعشقت كام مره
فيهم لمحت كتير
المخفي في الجره
واللي اندفن بالزير
وانا كنت روح حره
مشهوره بالتحذير
لون قهوتي مُره
واخده الزمن تكسير
وشغوف ومتحمس ..
وتشوفني ما اتأثرت
ولا ناوي أتأثر
كل اللي ليه انا خسرت
هو اللي عاز يخسر
دا انا عمري مااتاخرت
عن حد كان يغرس
خطوه ف طريق الود
رموا ف طريقي غرور
وبنولي حائط صد
واناماشي ابيع ترمس..
ترمس يابيه يامدام
ياأمة الإسلام
حسوا بقلوب بتنام
من جهد في التفكير
لا بقى يهب عبير
م اللي يجيب أحلام
والصوره فيها غدير
لكن اقترابها حرام
راح تعمل ايه ياغرام
والمستمع أصنام
لا هتفهمك ياأمير
يابن الهوى المخلص
يامدام يابيه ترمس
عديت على شِله
ووقفت وياهم
كلمه في حدوته ووداني سمعاهم
أكلتهم ترمس
فيهم اللي حكى أخبار
فيهم اللي غنى وثار
ووسطهم خَمَّار
بيصب ويكرس
وينيم المجلس
مش محتاجين ترمس …
حواديت تجيب حواديت
والكل في التوهان
سكتوا فقمت حكيت
سمعولي وبروقان
وبرقه وبإتيكيت
وصفت في الإنسان
عارفين كأني رميت
رضا يشبع العطشان
والكل كان عطشان.
قام شخص واتحمس
وقال كلام موزون
يريح المحزون
ويسد خرم أوزون
في دماغنا بيتربس
وينادي ع العاشقين
يدلهم بصواب
يتداروا م الخاينين
ويحافظوا ع الأحباب
ويريح المحتار
ويطمنه لبكره
والبركه في المختار
إذا يفهموا ذكره
هنشوف لليلنا نهار
ونحرر المقدس
إنده وقول ترمس …
ياعزول يابيه يامدام
هستغنى ع الترمس
بطلت ابيع ترمس
وهسيب هوا الكورنيش
أنساه وينساني
واقفل في وشه الشيش
وافتح لي شيش تاني
عنوانه أكل العيش
أستر به وجداني
من شمس أوطاني
وظلها المُفلس
دي نهايتي في الترمس
واللي اشتهوا الترمس
لازمانا فيه عاشقين
ولا فلاحين تغرس
حب ووداد وحنين
ولا عشق يتدرس
ولا عاد صلاح الدين
يسرد تاريخ أحمس
فلمين هبيع ترمس
والشيخ بقى يغمس
من بِـركة السفهاء
وضميره بقى ينعس
خدمه لعيون التاء
بقى زيه زي البقر
وبمعنى صح العير
ماتفوقوا يااهل البشر
بكفايه بقى تكفير
لزمن في نفسه عمر
يرجع ويبقى أمير
ويجيب معاه امحوتب
يفن ويهندس
والخِل يلقى خليل
ياكل معاه ترمس
خلاص ما فيش ترمس
لمين هبيع ترمس؟!
التعليقات مغلقة.