فوق الضِفاف ثرثره كلمات مسعدالبحراوي
فوق الضِفاف ثرثره
والمجرى بات ساكت
زهق من المنظره
وكلامهم الباهت
بصيت له بَصة خَجل
وندهت له مشاورش
كان شكله فاهم غلط
اوبالأكيد ما سمعش
رجعت خطوه لورا.
وندهت ع الترمس
ترمس يا بيه يا مدام
قام طفل قال لي بكام
رديت عليه بجنيه لك انت يا سُكره
وعشان عيون ضحكتك
خذ قرطاسين ببلاش..
الواد سكت مضحكش.
وخدوده طرحت كِرْش.
قال لي انت ليه ما معكش؟
غير بسمه مترقعه
منهوبه م المنفعه
انا قُلت خذ أربعه
واسكت ما تتكلمش.
صَبيه قالت هات
حبه بجوز جنيهات
خضيتها قُلت يا قمر
ما تيجي ننجب عُمر
يِصَلح اللي اتكسر
من غفلة الحُـكام
مِشْيت عَـوَجّت الكآب
وندهت ع الترمس
قالوا الهوىٰ غلّاب
للقلب بيحمِس
فعلاً كلامهم زين
الحُب نور للعين
لكن وجع ليّا
الخطوه فيه ديه
وانا لا كنت وريث
ولا عندي لبس عريس
يستر سنين جايَّـه
عجوزه أحلامي
نمله بتسبقها
والدنيا قدامي
الجهل بِحرقها
سرد المعاني حرام
خاصه ف حضور أيتام
واليُتم في الأيام
أصفر كما الترمس.
قابلني شاب عجوز
عقلي اتهبل ويجوز
عيني اللي زي اللوز .. ما بقتش بتحدد
هل اللي شايفه صحيح
والشاب ده فعلًا؟!
أهلاً يا سِيد الناس
خذ حَبه واتسلى
ضحكلي قُمت لقيت..
ما عندهوش سِنه
أكلت ترمس أنا …
وسألته عمرك كام
قال لي يا واد اختشي
ما انت أكيد عارف
أنا وانت كنا اصحاب
من مُده معدوده
لكن طريقي اختلف
اليوم معاه سنتين
ريشي الحرير اتنتف
كتبوبه كوم دواوين
ولما خلص الريش
خدوا سِنه ورا سِنه
قالوا الحياه في الخيش
بتْدَخل الجنه
أنا قُلت إستنى
إنت ابن عم أمين
وله انت تطلع مين ؟!
ضحك وقال يا حزين
أنا الشعور والدين والفضل والمِنَّه
ترمس يا بيه يا مدام
خلاص ما فيش أحلام
والميم سابتها اللام
تمشي على كِيفها
ولا زهره في الترابيع
ولا نسمه بنت ربيع
الشِعر بحره وضيع
ما بقاش يكيّْفها
ما بقاش ليه فيه عُشاق
يتمشوا ع الكورنيش
والزنق في الأنفاق
مُجبَر لأكل العيش
إلحق يا واد يا شاويش
السكه مقفوله وانت بتشرب شاي
عاوز أروح مطرح أدادي فيه الروح
قال الطريق نساي
هيدادي مين وله مين
سِيب الشمال شغال
روح ع اللي جَي يمين
الجاي ما لوشِ يمين
يا شاويش ما لكش لزوم
فاضل عليك اثنين
ونكمل الألبوم
ونعِـينُه مُتَلبِّس
تِرمس يا بيه يا مدام
خلصت اروَّح أنام
علشان أقوم بدري
وبكره يبقى تمام
هيحن لي قدري
ما انا طول حياتي أمل…
حتى اسألوا أحمس
يامجرىٰ ألف سلام
التعليقات مغلقة.