فووق لنفسك
أسـمـاء الـبـيـطـار
ظاهرة الإنتحار اللي سمعنا و قرينا عنها الفترة اللي فاتت
الكل دون استثناء رجعها للفقر و البطالة و التنمر
و القسوة و و و
بس من وجهة نظري البسيطة
أنا شايفة الأمور غير كده .
شيفاها إن إحنا تقريباً بنتولد و نكبر و مركزين على شئ معين
و لازم يتحقق بالذوق أو بالعافية
فمثلاً .. انت لازم تطلع دكتور زي بابا
فكرة جواز البنت بدري اللي مسيطرة على معظم البيوت المصرية
اللي حاطط في دماغه شغلانه معينه يا هي يا إما يقعد على القهوة
و يكره سنين عمره اللي قضاه في التعليم ِ
اللي حاطط ملامحه في دماغه و كاره نفسه
اللي و اللي
إحنا ناس ربنا مديها عقل مش علشان نجمده على شئ معين
و يا يحصل يا ميحصلش .
صحيح انت لازم يكون عندك طموح و أمل بس ما يبقاش فوق قدرتك و طاقتك .
و يا سلام لو عندك هواية
آه و الله زي حالاتي كده
كتابة رسم اي حاجة تخرج طاقتك الجميلة فيها
لازم تحب نفسك محدش هيحبك ادك
لازم يبقى عندك هدف و اتنين و تلاته و عشرة
مش هتجري وراهم كلهم في وقت واحد بس يبقى عندك صبر
و اوعى تجري علشان حد بيستعجلك
و اوعى تركز في كلام الناس
اللي اغلبه ليه تأثير سلبي عليك
فووق لنفسك ما حدش هيفوقك
التعليقات مغلقة.