فى وداع رمضان جزء من قصيدة عامية شعر محمد غانم الأبشيهي
رمضان أوله شهر الرحمة
وقلوبنا بتصفى وبتشارك
مع بعض وربنا بيبارك
في حياتنا وروحنا وأقواتنا
و ولادنا ودارنا واخواتنا
وفى كل ما لينا وأهالينا
رمضان ع الرحمه بيجمعنا
رمضان إنسان وزمان ومكان
شهر التفاريح وصلاة تراويح
بتداوي تعب كل المجاريح
وقلوب ريداه وبتستناه
بتروح لله وبتحكى معاه
وبتترجاه
سبحانه بيغفر ويسامح
ويداوى كل اللي واجعنا
ووشوش ع الطاعة بتدور
وفاضل لها حبه وتنور
من ذكر الله ..
سبحان الله والله اكبر
ما هي خايفه حسابه وعذابه
ولا يوم تنساه
وفى نفس اللحظه بتستغفر
من فضله بتدعي وتتمنى
حبه ورضاه…
يا ما شاء الله
ما هو ربنا قادر يدينا
سبحانه بفضله ويهدينا
يرزقنا الخير وما يمنعنا
رمضان ع الطاعه بيجمعنا
رمضان إحساس بقلوب الناس
رمضان ماحى لشر الوسواس
لذنوبنا نتوب من معاصينا
وعلى الله ربنا يهدينا
نتراحم كدا مع بعضينا
ونطبطب على بعض ونصفح
نستحمل بعض ونتعاون
والدنيا كبيره وهاتساعنا
رمضان فوانيس بتزف عريس
مشتاق للطاعة بيقرب
من ربنا أكتر ويقرب
بدعاء وقيام وعيون ما تنام
وعمل وصيام
أوقات محبوبه وليها معنى
رمضان أنوار مليان أذكار
صلا واستغفار
وبالاستغفار
ربنا بينجينا م النار
وكمان أسرار
ما بين العبد وبين ربه
وهدوء وعمار
وبيصلح أحوالنا وروحنا
رمضان بالقران يجمعنا
التعليقات مغلقة.