في الكــــارو…بقلم الشاعر معوض حلمي
لسه يابيه بتسألني أحب أموت
وخوفي طاغوط
في يومي باموت 200 مره
200 مره في يومي باموت
هموم بالكوم على كتافي
بادور حافي على السكة في عز الضهر
بدال المهر في الكارو باجر واشيل
وطول الليل وانا صاحي مابرمشي
ملامح وشي وحشاني تفاصيلها
حتى مرايتي مش فاضي أبص لها
لا أنا مــرتاح ، ولا بـالي متهــني
ولسه يابيه بتسألني أحب أموت
وخوفي طاغوط
في يومي باموت 200 مره
200 مره في يومي باموت
وزايده م الوجع ناري
باداري همومي ف هدومي
عشان كومي ماهوش ليا
ولا أحلامي بتجيلي
باشد ف حيلي مايكفي
وجوعي زي جلد السوط
بيقطع فيا ويشفي
ويدش عضامي بالنبوت
معادتش اللمه بتدفي
ولا بيوفي العهود خلان
وجار بخلان مابيسألشي
ماتفهمشي في زمان النت
شكل البت قلبت واد
ويمشي الواد يقلد بت
واوعى تبت في الموضوع
معادش دموع تصبرني
ولسه يابيه بتسألني ، أحب أموت
وخوفي طاغوط
في يومي باموت 200 مره
200 مره في يومي باموت
زرعت التوت عشان اللقمة تحلالهم
لقيت بالهم ماهوش صافي
ولا أوصافي عجباهم
برغم النيه كات بيضا
وشيلت الشيله وياهم
ولما الجو راق ليهم
بان الغدر في عينيهم
باعتولي العيار طايش
ماليش بينهم ياعم مكان
تشوفني آه تقول عايش
وانا بايش ماليش عنوان
ولا دكان يشيل إسمي
ورسمي بوظ الصوره
على القوره النصيب مكتوب
بانام مغلوب واداري الجرح
وعمر الفرح مازارني
ولسه يابيه بتسألني ، أحب أموت
وخوفي طاغوط
في يومي باموت 200 مره
200 مره في يومي باموت
بينام عــــندي الأمـل مكســور
فلاح ولابس هدمتي الكاستور
مستور دا نقبي والجيوب فاضيه
الضربه قاضيه جت بسن ساطور
وبرغم ذلك
لساني بازرع ف الغيطان النور
تطرح سنابل غيري يحصدها
تاجر ويحلف ميت يمين بالزور
وانا الفريسه بنبلته يصيدها
وانده ياقاضي العدل ماتسمي
أفتح لي جلسه وشيل بها همي
غربان وسكنوا الدار ، ودقوا اوتاد
قاموا عليا مزاد ، وقسموا ف دمي
ولسه يابيه بتسألني أحب أموت
وخوفي طاغوط
في يومي باموت 200 مره
200 مره في يومي باموت
200 مره في يومي باموت
بقلمي الفلاح الفصيح
معوض حلمي علي
منشأة بطاش
تمي الأمديد دقهلية
التعليقات مغلقة.