في الممنوع شعر… وحيد علي الجمال
لما كتبت قصيدة
في وجعي و اللي
حاصلي و هيحصلي
زعقوا وقالوا ايه
يا صاحبنا
ربك بكره راح يفرجها
أنا متأكد طبعا خالص
سر يقيني و دا معتقدي
بس رسولي و دا قدوتنا
رغم إيمانه بالمكتوب
كان من حزنه و حبه
في ابنه عينه بتبكي
ع المولود
لما الروح فاضت لخالقها
و دا كان ابنه و فلذة كبده
قاموا سألوه إنت بتبكي
زينا عادي و لا الحزن
دا شيء مكتوب
بص و هو دموعه بتجري
أصل الرحمة في قلب صاحبها
دايما بابها كدا مفتوح
تبقى الأهه و الدمع
بحرقه مش متحرم
و لا ممنوع
إيه ياخونا هو الدمع
راح يتصنف في الممنوع
زي الفرح ما تاه في بلدنا
مفضلوش من تاني رجوع
التعليقات مغلقة.