فَرَّقِي الورق اللي فاضل…
وحيد علي الجمال
(فَرَّقِي الورق اللي فاضل)
فرقي الورق اللي فاضل
اختاري منه بصرتك
والعبي يالا بفريقك
وارمي عنادي ف سكتك
مايغركيش صبري عليكي
شايف نهايتي واضحة فيكِ
وانتِ الاخيرة ف سكتي
ماتلجميش الحرف فيكِ
ومتكسريش بقى فرحتي
ليه لما اقول فيكِ الحقيقة
بتسكتي وتمتمي
دا نصيبي أصله وقسمتي
ارميني خارج دايرتك
واكتبي حُكمك قوام
قبل اما المح كدبتك
واحلفي إن الخيال اللي اتحكي
دا يبقي فصل في قصتي
الكل جم يتفرجوا وينظروا
ويكبروا في دايرتك
وكتير في دايرة حضرتك هيصدقوا
وكمان كتير في دايرتي
اصل انتي في التأليف بتبقي مبهرة
وحبكة الأحداث بتبقى مؤثرة
حقيقي فعلا كنت هايلة انا بحسدك
وأنا كنت من اعجابي بيك
هكَدِب العمر اللي عشته
واعيش مصدق كدبتك
فرقي الورق اللي فاضل
وارمي ويا البصره حاضر
غرقان في بحر من المشاكل
ممنوع يجيب لجرحه ساتر
أو يشتكي
يضحك وجوه بلوِتُه
مجبور يكمل سِكِتُه
ممنوع يقَلِب في الدفاتر
ارمي ويا البصره ماضي
وقلب من جوه انكسر
ارمي شايب عاش في قلبه
ميت ولد
كان بيضحك وضهره م العشق انجلد
واختاريني بعد سيف
حظي منك زي ضيف
سمع الحكاية وانصرف
اصل سيفي كان ورق
معرفش يتحدى الطوفان
جدفت فيه جوه الديوان
حتي الديوان بتاع زمان
خلص قصيدتي وانسرق
عدي البنات جوه الورق
وارمي جنب البنت كومي
واغمزيلي قبل ما أقش الورق
غمضت عيني شوفتها
سحبت وعودي عندها
حرقت كروتي كلها
خلصت دوري؟
عد الورق
وحيد علي الجمال سرس الليان محافظة المنوفية جمهورية مصر العربية
التعليقات مغلقة.