قدر مكتوب شعر وحيد علي الجمال سرس الليان محافظة المنوفية جمهورية مصر العربية
هودع ايه فاضل بيننا
وايه بيننا ماودعناش
دا آخر حلم كان بيننا
على عنادنا هرب منا
كأنه مجاش
سنين مرت على خصامنا
ورغم الصُلح كان بيننا
غرِقت في صمت أحزاننا
وعشتك والدموع بيننا
بقاسي قربك الباكي
وغربة حبنا كبرت
وانا وياك
زرعنا كتير في أشجارنا
ووصلك كان لنا جنة
وصبر العشق كان جارنا
غفرت ذنوب كانت بيننا
وذنبي فيك فضل بيننا
يغَيّر في تفاصلنا
بنام والخوف على حضنك
يبات مصلوب
وأشوف الحلم في وَجْدِك بتفسيره كمان مقلوب
ودمعي فيك على خصامك قدر مكتوب
سُكاتنا بيننا كان طارح
دموع نارها على الأشواك
كأن الحب كان طالع مابين
أموات
وهكتب ايه عن الماضي
مادام قلبك
نَصَب ضد الهوى ثورة
وعامل وقفه واحتجاجات
ولو بَيِّنت له عيوبه
بيتنرفز ويتضايق
ما انا عارف تمام طبعُه
وبتغَلِب على رفضه بتنهيده وكام حركة من الحركات
كلامك لسه في قصيدتك
بيفتح جوه أيامي براح
سماوات
انا فجرك ولو كان الجفا طبعك مانيش واخد على الحوارات
هسيبك تكتب القصة على كيفك
وتختارلك نهاية تكون بتأليفك
يا إما تسيب بقى خوفك وأسبابك مع ظروفك
يا إما فراقنا يبقى سكوت
اتوه انا وحدي فى الملكوت
وزادي الذكرىٰ مع طيفك
التعليقات مغلقة.