قرب و شوف خاطرة من وحي الصورة بـقلم أسـمـاء الـبـيـطـار
قرب و شوف و بحلق معايا ف الوشوش
و سيبك من القلب المرسوم جوا الصورة
و بص معايا على اليمين
هتلاقي الهم مقطّب الجبين
و العينين متكحلين بشوية دموع
حفروا مكانهم على الخدين
شوفت إنت الصورة من بعيد
قوااااام قولت يا سلام
على الخدود الموردين
و لّا العيون النعسانين حب و هيام !
طيب قرب مني كمان
و بص معايا على الشمال
عن نفسي
شايفة جدع شايل فوق كتافه حِمل تقيل
غمض عينيه من تُقل اللي وراه و اللي عليه
و ساب ليها الزمام و بيلف هو ف ساقية الحياة
و مش شايف قدامه شبرين
قرب كمان و كمان
علشان هقولك شوية تفاصيل مش ف الصورة
انت عينك جت ع المرسوم
لكن أنا حسيت بالقلب المكتوم بين الضلوع
قلب بيصرخ وجع
جوا البِنيه قبل الجدع
قلب شايل فوق طاقته حبة أوجاع ما تتحكيش
أمانة عليك لا تقرب أخر شويتين
هقولك على كلمتين من خبرة كام سنة
ما فيش سعادة بتترسم
جوا صورة
السعادة بتلاقيها منورة الوشوش
و اللي في القلوب بيتنطط ف العيون
لكن بيني و بينك أوقات كتير بنكون مضطرين
نمثل إننا مبسوطين
علشان حصار السين و الجيم
قرب بقى مني و اديني ودنك
انت كمان صعبان عليا حبتين
لما عينك إتجاهلت الوشوش
ووقعت ع القلب المرسوم
اللي منه انت كمان محروووووم
دا إحنا غلابة قووووي خال
كل واحد فينا فيه اللي مكفيه
و بنحسد بعض على حتة صورة
في قلب تفاصيلها هموم بالكووووم
و ما شوفنا فيها غير القلب المرسوم !
التعليقات مغلقة.