قريب الباشا مشهد تمثيلي تأليف محمد كسبه
تخيلوا أنا عارف عن الباشا أكتر من إللي يعرفه عن نفسه عارفين ليه ؟
ليه ياعم إسمعين .
الباشا ابن عمي من كتر مشاغله بينسى حاجات كتير .
حاجات زي إيه يعني .
صحيح و إنتو إيش عرفكم لا عمركم قعدتوا مع بشاوات ، و لا عمركم عاشرتوا بهوات أصلكوا وش فقر .
الباشا ابن عمي بينسى المواعيد و بينسى الأسامي و بينسى ياكل و بينسى يشرب و أنا إللي بفكره .
أوعى تقولنا بينسى يعمل حمام .
لا سيدي دي حاجة ولا مؤاخدة مش محتاجة دماغ خالص ، الموضوع ده عامل زي الشحن و التفريغ توماتيكي توماتيكي كده يعني .
فهمت ياد يا بقرة ولا إنت مخك تخين زي الحمار بتاعي .
فهمت فهمت بس من غير شتيمة .
شتيمة إيه !! دنا بدلعك يا حمار .
في مرة الباشا كان رايح اجتماع ، أوم إيه صحي بدري خالص ، لبس القميص و الكرفتة و جاكت البدلة و نسى يلبس البنطلون نزل بالشورت و أنا لبسته الجزمة و يدوب كنت لسه صاحي و بدعك في عيني ، حاولت أفهمه إنه ناسي البنطلون ، بصراحة مكنش فاضي و قالى مش مهم ، أنا لازم أروح الشركة ، و بعدين دي شركتي و انا ادخل و أطلع فيها براحتي ده حتى الشورت خفيف .
بيني و بينكم انا إقتنعت بوجهة نظر الباشا أومال إيه ، هو أنا هعرف أكتر من الباشا .
-بقى الباشا يا إسمعين يروح الشغل بالشورت دي حتى تبقى عيبة .
عيب إيه امشي ياد بعيد عن هنا ، إنت هتفهم أكتر من الباشا يا حمار .
بسرعة كدة خفيف خفيف طلعت جري ، جبت له البنطلون و لبستهوله في العربية دي حتى تبقى عيبة في حقي .
مانا كنت بقول كده .
إنا إللي أقول مش إنت يا بجم ، دنا ابن
عم الباشا
المشكلة بقى إني روحت معاه الشركة بالكلسون و السديري أي و الله .
الواد علي الحمار الخدام بتاعي نسى يلبسني الجلابية بس هيروح منى فين .
طب يا عم اسمعين بما إنك يعني كده كبير القعدة و قريب الباشا ، انا ابني عايز يعمل عملية و الحكيم قالنا إن العملية دي بتعمل في مستشفى كبيرة في مصر .
٥٠ جنية
بتوع إيه ؟ الكشف يعني
لا يا خفيف دول بتوع التظبيط و التكتيك و التخطيط .
خد حار و نار في جتتك بس خلص لي الموضوع ده .
هات ياكش تولع يا شيخ و تخلصنا من قرفك إنت و ابنك .
وسع يا وله وسع يا وله الباشا وصل .
يا باشا الواد اسمعين بيقول ٱنك ابن عمه .
يعني إنت يا جزمة نسيت مشاكلك كلها ، و جاي تسأل الباشا انا ابن عمه ولا لأ ؟
ع العموم أنا ابن عمه داير فاهم يعني إيه داير يعني دور وشك و غور في داهية .
الباشا ينظر لاسمعين و يقول إنت لسه واقف بتحكي انجر يا حمار روح هاتلي علبة سجاير .
تؤمرني يا باشا قال ابن عمي قال ، هو يطول يبقى قريبي مسيره في يوم يقولي يا باشا .
التعليقات مغلقة.