قريب الباشا ” ١٠ “… عروسة دهب تأليف محمد كسبه
في القهوة
واد يا حسونة ، هات كوباية شاي يا وله ، و حط عليها عود نعناع لحسن دماغي مصدعة .
أيوة جااااي ، و عندك واحد شاي على ميه بيضة و صلحه .
لمين الشاي على ميه بيضة يا حسونة يا حمار .
بقي اسمعين يشرب شاي فتله دي حتى تبقى عيبه و الله و يعايروني بيها في البلد ، أنا بشرب شاي براد تقيل و هات لي معاه عود نعناع ، و ياريت لو تعرف تعمل لي شاي ع الراكية تبقي ١٠٠ ال ١٠٠ .
يا اسمعين تاخدلك حباية من دي تظبط لك دماغك ، هتعيش في دنيا تانية يا وله ولا هتحس بصداع ولا غيره ، أصل أنا شايفك جاي من بعيد و بتعرج كده يعني .
حباية إية الله يخرب بيتك بوظتوا شباب البلد
دي حباية اسبرين بص شوف ريفو أهه.
أيوة هات دي إنما الحباية التانية الله الغني عنها .
إلا قولي يا اسمعين إنت كنت جاي بتعرج ليه ، و ماسك جنبك ليه ؟
إني لقيت القطر واقف في العزبة ، ركبت قولت أنزل البندر أجيب شوية طلبات .
و بعدين إيه إللي حصل ، ده القطر كان فيه حرامي و سرق البلد كلها .
مانا شوفتكم بتجروا وراه لحد ماركب في القطر ، قولت بقى أنا هعلمه الأدب و هعلم عليه و أجيب لكو الحاجة إللي سرقها .
جدع يا اسمعين .
المعلم شرف : إنت ياد يا حسونة سايب الزباين و بقالك ساعة بتحكي مع اسمعين ، دي قعدته زي قلتها ، يعني كوباية شاي ع النوته ، و حلني على بال ما يدفع إللي عليه .
إنت بتعايرني بكوباية الشاي يا معلم شرف .
و إنت يعني بتحس على دمك ، طب هات الحساب إللي عليك .
الواد حسونة : اسمعين ده راجل جدع يا معلمي ده مسك الحرامي بتاع القطر .
أني لا مسكت حرامي و لا نيلة ، دنا لسه بهجم علية عشان أخد الحاجة إللي سرقها و أجيبهالكم .
هه و بعدين
إنتو بتبصولي كده ليه ما انتو شايفين ، هو مش باين علي وشي .
لا مش باين عليك ، هيه عملت إيه ؟
ليه هو إنت إتعميتوا , إنتو إتلميتوا حواليا كده ليه ؟
آه يا دماغي ، آه يا ركبي ، آه يا جمبني .
ياد بطل بقى ، قولنا عملت إيه مع الحرامي
إني يدوب ضربته قلمين .
هه و بعدين .
هو طلع المطوة و إني إتسمرت مكاني ، فضل يضرب فيا بالبونيات و الشلاليت و بالرجل ، عد إنه بينفض مرتبة .
بس أنا مسكتلوش
جدع يا اسمعين عملت إيه ؟
إديت له كل إللي معايه ، أومال إيه أسيبه يضربني ؟
لا و الله !!! جتك خيبة ، طب و ركاب القطر محدش إتعرض له !!! محدش وقف معاك !!!
لأ والله كلك كانوا واقفين .. واقفين بيتفرجوا عليه ، المهم قبل المحطة بشوية ، و إني واقف قرب الباب راح شمطني برجله وقعت م القطر ، الحمد لله إني وقعت على كوم قش ، كان زماني ميت .
الف سلامة عليك يا اسمعين
تشكر يا حسونه ، هات الشاي بقى
لا شاي و لا غيره إنت تروح تنام عشان ترتاح ، سك ع الشاي يا وله .
بقى مستخسر فيا كوباية شاي يا معلم ، صحيح كل واحد بيعمل بأصله ، إني هسمع كلامك و أروح أنام .
المعلم : يكون أحسن ، آه يا ناري لو كت مسكت الحرامي دنا كت وريته النجوم في عز الضهر .
اسمعين يخرج من القهوة متكأ على عصاه من الخشب و يصل للفيلا
بت يا وهيبة إندهي للزفت اسمعين ده
حاضر يا ممدوح باشا
إنت كنت فين يا منيل و مين إللي عمل فيك كده ؟
ده موضوع يطول شرحه يا وهيبة .
طب كلم الباشا .
هو الباشا هنا ؟
لأ ممدوح باشا عايزك ، لا و الله دنا إللي عايزه ضروري ، إنا طالع له أهوه .
صباح الفل يا دوحه .
إيه دوحة دي !!!! إنت هتصاحبني ولا إيه يا ولا ، فز قوم من على الكرسي لتوسخه يا معفن ، إنت جاي منين ؟ أخرج بره بريحتك الوحشة دي .
طب ما تشخطش إني خارج أهوه ، بس فيه طلب صغير كده يعني .
طب كلمني من بعيد عشان الريحة .
دي ريحة بهايمكو يا ممدوح باشه .
بلا بهايم بلا زفت ، إنت عايز إيه خلص ؟
أني عايز فلوسي .
فلوسك بتوع إيه يا اسمعين .
هو إنت شارب ولا إيه ؟
لا و الله لسه مشربتش و كنت بنده لك تجهز لي المنقد و الشيشة يا حمار .
بلا منقد بلا شيشة بلا نيلة ، ما تفوق بقي يا ممدوح ، إني عايز فلوسي .
إني ليا عندك لحد دلوقتي ٢٣ ألف و سبعمية و خمسة و عشرين جنية ، مثبوتين في النوتة باليوم و التاريخ .
طيب هديهملك بس ال ٢٥ جنية الآخرنين دول بتوع إيه ؟
بتوع علبة السجاير الأخرنية بتاعت إمبارح .
طب يا سمعه يا ابن عمي إنت عايز الفلوس دي ليه ؟
دنا بحوش لك و خايف عليك ، مش يمكن حد يضحك عليك و يضيع لك فلوسك .
إيوة خش عليا بالحنجل و المنجل ، لا متخافش الفلوس دي تحويشة عمري و أني هحطهم في البنك .
ثريا هانم تخرج من أوضتها .
صباح الخير يا اسمعين ، صباح الخير يا دوحه
صباح الخير يا هانم
إيه الريحة الوحشة دي يا اسمعين ، ريحتك وحشة أوي ، روح خدلك شاور .
حاضر هاخد شاور في الترعة يا هانم .
ثريا هانم تنزل من على السلم .
ركز معايه يا اسمعين ، اشمعنا دلوقتي هتحطهم في البنك يا سمعه ؟
عشان هشتري شهادات إستثمار من إللي بتكسب ١٨ ٪
آه يعني إنت عايز تكسب ال ١٨ ٪
إيوه يا دوحة يا حبيبي يا صاحبي يا قريبي .
طب يا اسمعين يا ابن عمي .
أنا لا ابن عمك ولا أعرفك ياد يا ممدوح ، بقى أنا أعرف الاشكال دي !!!!
هات الفلوس يا إما هفضحك و أقول لأبوك على مصايبك السودة ، ع البت توحة إللي بتنضف لك الأوضة .
لأ … لأ خلاص أنا هريحك يا اسمعين يا ابن عمي .
طب أمشي بعيد عني يا ولا يا ممدوح ريحتك سجاير .
طب بس نزل رجلك يا اسمعين متحطهاش في وشي و إنت بتكلمني .
لأ … مش هنزلها خليها في وشك كده ، إذا كان عاجبك ، عاجبك ولا لأ ؟
عاجبني عاجبني يا سمعه .
هات بقي الفلوس .
بتوع إيه ؟ فلوس إيه ؟
ألاه هو إنت لحقت تنسى ؟
طب بص أنا هعمل لك نظام أحسن من شهادات الاستثمار .
و ماله هو إنت فودافون ، طالما هكسب ميضرش ، إيه هو بقى النظام ؟
أنا هديلك فوايد ٢٠ ٪ و هتاخدهم النهارده ، لا هتخدهم دلوقتي .
صحيح يا دوحة .
ممدوح باشا يا معفن ، إخرج بره الأوضة عشان ريحتك الوحشة دي ؟
هخرج حاضر بس نتفاهم هتديني ال٢٠٪ إزاي يعني ؟
يعني لو إديتني ١٠٠ جنية دلوقتي هديلك ٢٠ جنية مكسب و تاخد فلوسك زي ماهيه بعد سنة .
طب خد أدي ٥٥٠ جنية هما إللي حيلتي دلوقتي ، دول كانوا في السديري .
ابن الحرام خد اللي في جيب الجلابية ، يلا ناولني مكسبهم بقي .
اتفضل أدي ١١٠ جنية مكسب حلال بما يرضي الله ، مبسوط يا اسمعين .
حبيبي يا دوحة باشه ، دنا هجيب لك البلد كلها تحط فلوسها عندك .
و ماله أنا بحب الناس تكسب و بحب أخدم الناس ، طب و حياة سيدك البهليطي يا سمعه ، أنا بحبك و بحب أهل البلد كلك المعفين زيك .
ياااااه يا بشر دي الفلوس دي بتعمل عجايب ، إنت بتتكلم زي بتوع الإنتخابات يا باشه ، ما ترشح نفسك في الإنتخابات يا دوحة .
حاضر حاضر هترشح في الإنتخابات .
ولا يا اسمعين بتعرف تفسر الأحلام
إيوة بعرف أموال إيه ، إنت حلمت بإيه يا دوحه ؟
أنا حلمت إني كنت راكب العربية و دخلت جوة الصحرا و كان فيه واحدة حلوة أوي قدامي بتجري و لبسة فستان فرح دهبي ، و أنا نزلت من العربية و كنت بجري وراها و كل أما أحاول أمسكها تهرب مني ، و لما مسكتها اتحولت لحجر و وقعت اتكسرت ، ده يبقى إيه يا ممدوح ؟
عروسة دهب يا باشه ، إبقي إستغطى و إنت نايم يا باشه .
التعليقات مغلقة.