قريب الباشا ” ١٣ ” الفنجان تأليف : محمد كسبه
على باب الفيلا
يا اسمعين يا اسمعين
أيوة يا ست هانم ، حاضر جي أهوه .
لو سمحت انده للست العرافة دي بسرعة .
إنتي يا ست ، يا أم السعد ، تعالي هنا الست ثريا هانم عايزاكي .
حاضر ، أني جاية للهانم .
أوامرك يا هانم ، تؤمريني ، يا أميرة يا ست الكل .
باين علي وشك الرضا و القبول و السماحة .
الله يخليكي يا أم السعد ، لو سمحتي ممكن تقوليلي بختي .
أقرالك الطالع ، ولا أقرالك الكف ، و لا أقرالك الفنجال .
لا طالع ولا كف تعالي إقري لي الفنجال .
يا اسمعين هات لها الفنجان بتاعي ، إللي بشرب فيه قهوة عشان الست تقراه ، بس اغسله و نضفه كويس .
يا ست ثريا هانم لكل شغل أصول .
مش فاهمة يعني إيه ؟ عايزة إيه ؟
يعني حضرتك لازم تشربي القهوة ، و تسيبي شوية في قعر الفنجال ، و بعدين تهزى الفنجال شمال ويمين ، و تحطي الصحن فوق الفنجال و تقلبيهم ، يعني تخلي الطبق تحت و الفنجال فوق مقلوب ع الطبق .
و ماله خلاص تعالي معايا فوق .
يا ست هانم بلاش تدخليها أوضتك لتطلع حرامية .
حرامية في عينك يا اسمعين الكلب إنته .
يا ست هانم أني لا طالعة ولا نازلة .
طاب أنا هجيب لك كرسي يا ست هانم و هجيب لها برضة كرسي ، و أقول للبت هنية تعمل لك فنجال قهوة .
قهوة مظبوطة يا اسمعين ، تشربي قهوة معايه يا أم السعد .
لا يا هانم أنا مش عايزة أشرب ،أناوعقعد ع الأرض .
هو حضرتك بتشتغلي الشغلانة دي ليه يا أم السعد ؟
ههههه الشغلانه دي أكل عيشنا يا ست هانم و ورثينها من جدود جدودنا .
إنتي منين ؟
إحنا الغجر ملناش مكان بنلف و نسرح في الموالد .
و بتعيشوا فين يا أم السعد ؟
كل عيلة ليها خيمة .
طاب و الأكل و الشرب و الميه والحمام ؟
ربك بيستر يا هانم ، إحنا إتعودنا على كده .
يا هانم إتفضلي الفنجال ، فنجال القهوة مظبوط ، دي البت وهيبة أحسن واحدة تعمل قهوة ، شايفة وش القهوة يا ست هانم ؟
آه جميل ، شكرا يا اسمعين .
يسلم ذوقك يا هانم ، و الله بنت أصول .
الهانم بتشرب القهوة و تكمل حديثها مع العرافة .
هو إنتي متجوزة يا أم السعد .
كنت متجوزة ، و إللي عامل نفسه درويش ده هو إللي قتل جوزي .
حي … الله حي ، كدب يا ست هانم أنا مظلوم ، جوزها كان حرامي و سرق ….
بس خلاص ، أنا مش بحب أسمع الحاجات دي ، لو سمحت يا عم الدرويش ابعد عن هنا .
حي …. الله حي ، كل شيء معلوم و الظلم مش هيدوم ، ربك هينصر الغلبان و الضعيف و المظلوم … حي
أسفة يا أم السعد قلبت عليكي المواجع ، أنا بخاف أسمع عن الحاجات دي .
اتفضلي الفنجال أهوه فيه شوية قهوة في القعر زي ما طلبتي ، حلو كده .
كده حلو خالص ، بس إرمي بياضك يا شابة .
يعني إية بياضي ؟ و أرميه إزاي و فين ؟
ههههه ، بياضك يعني عايزة منك فلوس يا ثريا هانم .
أوكيه فهمت يا اسمعين عادي عايزة كام .
اديها ٢٠ جنية يا هانم ؟ بس خلي بالك فنجان يعني فن من فنون الجان اسمه ( فن جان ) يعني العفريت بيرسم خطوط في الفنجان و هي بتعرف الحظ من الخطوط و الأشكال إللي بيرسمها .
اسكت يا اسمعين اسكت خليها تشوف لي البخت و تمشي .
بصي يا هانم امسكي الفنجال من بره و هزيه شمال و يمين مرتين تلاته و حطي الصحن فوقه و اقلبيهم .
فهمت أهوه اتفضلي اقري الفنجان .
اصبري دقيقتين يا هانم.
اتفضلي
شايفة الخط إللي طالع ده .
أيوة شايفاه ده معناه إيه ؟
حي … الله حي لا طالع ولا مطلع ولا عارف ولا سامع إلا الله متصدقهاش حي .
إمشي غور بعيد ماشي ورايه ليه ؟
خد يا اسمعين عشرة جنية إديهاله و مشيه من هنا ؟
خد يا عم يا أهبل إنت و إمشي غور من هنا بدل ما أضربك .
-كملي قولي يا أم السعد يلا .
الخط إللي طالع ده معناه إن الأيام الجاية حظك في الطالع و الغايب هيعود و الميه هترجع لمجاريها ، هو بيحبك و إنتي بتحبيه ، و إنتي إللي بتغلتي عليه و بتغصبيه علي حاجة مش منه .
بصي الخط ده أوله معووج بصي كده أهوه معووج صح .
هو فيه شوية متاعب هتحصل في الأول ، و فيه حد بتحبيه مش منك و هيطير لفوق لفوق خالص .
يا ساتر يارب بنتي حبيبتي فال الله ولا فالك .
طب و النقطة السودة إللي تحت دي معناها إيه ؟
دي مشكلة متخصكيش بس إنتي إللي خدتيها لنفسك ، هي تخص أخوكي الباشا الصغير , و القلوب بتحن و كل شيء هيرجع لأصله بعد فوات الأوان .
-مش فاهمه يعني جوزي هيرجع لي بعد المشاكل دي كلها .
المشاكل دي بسببك إنتي هو ملوش دخل فيها ، هو بيحبك و هترجهوا لبعض ، و عقدة الخلف هتتفك و هتخلفي من جوزك .
بس الدكاترة قالوا إني مش هخلف .
ميعرفوش …. ميفهموش ده كل شيء مكتوب .
طب و إيه كمان .
إنتي طيبة و ربنا هيعوضك خير .
شكرا يا ست شكرا يا أم السعد بس كده أنا خوفت على بنتي ميان .
يا ست هانم الست دي هبله متصدقهاش دي بتقول أي كلام فاضي ولا له ٣٠ لازمه .
لأ يا اسمعين دي عارفة الطالع و أنا صدقتها .
تمشي العرافة و من خلفها الدرويش .
حي… الله حي … قادر على كل شيء ولا يخفى عليه شيء حي .
واد يا إسمعين انده للست دي .
لأمش ناده لها ، بلاش كلام فاضي يا وهيبة .
لا و النبي إنده لها يا سمعه .
حاضر عشان خاطر يا سمعه دي هنده لها .
يا ست يا أم السعد تعالي وهيبة عايزاكي تشوفيلها البخت .
حاضر تعالي يا وهيبة تعالي يا ست البنات .
اقري لي الكف .
هاتي إيدك .
خدي اقري لي بسرعة عندي شغل .
الإيد دي إيد نضيفة و القلب أبيض و الحظ متقلب .
ليه يا خاله كده
هو كده حال الدنيا يا بنيتي .
يعني مش هتجوز يا خاله .
مين إللي قال كده ، إنتي هتتجوزي قريب من واحد دايما تدخليه في مشاكل هو بيحبك ، و نفسه يتقدم بس بيخاف منك حبتين أصلك زعلتيه كتير .
يا تري مين هو يا خاله .
إنتي عارفاه كويس و علمتيه الأدب و تقريبا كده تاب على إيديكي .
و ماله طالما أني علمته الأدب يبقى كويس ، خدي يا خالة عشرة جنية أهه ، مع السلامة يا خالة .
طب و البلد أخبارها إيه يا أم السعد يعني إللي جاي حلو ولا وحش.
يا اسمعين البلد ….. هتصبح في ميه و تبات في نار .
غوري جتك خابط مش ناقصة هبل مية ونار قال ، أما الناس دي عليها كلام ، معرفش يا أخويا بيجبوه منين.
التعليقات مغلقة.