قريب الباشا ” ١٦ ” قضية خلع بقلم.. محمد كسبه
بيت أشرف زوج ثريا هانم
- أشرف يا ابني يا حبيبي إنت بقالك سنة دايخ في المحاكم مع مراتك ثريا منها لله ، هي عايزة تخلعك و إنت مش راضي تسيبها ، يا حبيبي إنت مهندس قد الدنيا و ألف واحدة تتمناك .
- يا ماما أنا مش عايز أي واحدة تانية ، أنا بحب ثريا و كل إللي بينا ده سوء تفاهم و مسير الأمور تتصلح .
- تتصلح إزاي يا بني ده إنت كل شوية متبدهل في محكمة الأسرة ، كفاية إنها مبتخلفش و متبنية بنت لقيطة من الملجأ .
- على فكرة يا ماما إللي إنتي متعرفهوش للأسف .. أنا السبب ، أنا إل عندي مشكلة ، أنا كشفت عند أكتر من دكتور و عملت تحاليل كتير و طلع السبب مني ، و هي مظلومة و مفهماكي و مفهمة العيلة إنها السبب ، و إن هي إللي مش بتخلف .
و بعدين يا ماما هي بتحب الأطفال و نفسها تبقى أم ، و أنا بسبب الموضوع ده ، قولت لها كذا مرة لو عايزة تتطلق أنا موافق ، و هي رفضت . - لا يا شيخ بقى إنت عرضت عليها الطلاق و هي رفضت ، دي مش طايقاك أصلا ، دي رافعة عليك قضية خلع ، يعني عايزة تتطلق غصب عنك ، معرفش إنت متمسك بيها ليه يا ابني هو إللي خلقها مخلقش غيرها .
- لأ مخلقش غيرها ، هي مهما عملت أنا بحبها ، هو السبب موضوع الخلفة بس .
و هي اقترحت عليا فكرة التبني ، أنا طبعا رفضت ، مع الإلحاح أنا واقفت بشرط إن البنت متكتبش على الورق باسمي ، و خليتها هي إللي تمضي على إجراءات التبني ، البنت في الملجأ كان اسمها ميرفت ممدوح و هي سميتها ميان و بصراحة البنت هادية جدا . - إنت مالك بتتكلم بحنية كده ليه ؟ يعني بعد بهدلة المحاكم دي كلها ، لسه بتحبها و كمان كلامك كده معناه إنك غيرت رأيك و ممكن توافق إن البنت تعيش معاكوا عادي .
- و الله كلامك صح ، على فكرة البنت بتقولي يا عمو أشرف ، و بتقول لممدوح أخو ثريا يا بابا و هو ما اعترضش و عارف انها جاية من الملجأ و مع ذلك حبها جدا .
الجرس بيرن يا ماما ، شوفي مين ع الباب .
تفتح الباب - السلام عليكم
- و عليكم السلام
- اتفضلي يا حجة الطلبات بتاعتكم و دي الفاتورة .
- تمام خد الحساب ، و خلي الباقي عشانك .
- ألف شكر يا هانم .
- ده الواد بتاع الدليفري جايب لنا الطلبات .
طاب ما تطلقها يا ابني و تخلص من الهم ده . - لأ يا ماما هي بتحبني .
- طاب مهي رافعك قضية و طالبة الطلاق .
- آه هي رافعة قضية لأني كنت عايز أرجع البنت للملجأ تاني ، و هي رفضت لأنها ارتبطت بيها و بتحبها جدا ، ثريا يا ماما زي الملايكة ، إنسانة طيبة و رقيقة ، تخيلي أنا لسه بتصل عليها و بكلمها ع الواتس و الماسنجر و بضحك معاها في أي حاجة غير الموضوع ده .
- يا سلاااام !!! ده إيه الهبل ده .
- مش هبل إحنا اتفقنا إننا نحترم حكم المحكمة و ننفذه أيا كان ، يعني بتشتكوا بعض في المحاكم و بتحبوا بعض ، طاب إزاي !!!
الكلام ده ميخشش دماغي ، إنت شارب حاجة يا أشرف . - ههههههههه يا ماما إنتي متعرفيهاش دي إنسانة بسيطة جدا و طيبة خالص ، و بعدين يا ماما دي كانت الأولى على دفعتها في كلية الهندسة و كانت هتبقى معيدة .
- بلا معيدة بلا نيلة هي البت دي عاملالك عمل ولا إية ؟
- ده حب ، تخيلي أنا أقنعتها ترفض العمل في الجامعة و كمان مخليتهاش تكمل ماجستير و دكتوراة .
يعني أنا حطمتها يا ماما ، و هي دلوقتي كبرت ، ده قعدت معاية ٨ سنين من غير خلفة و كانت متحملة و راضية و عارفة إن العيب فيا أنا .
و بصراحة أنا مكنتش طايق البنت ميان تعيش معانا ، فهي خدت البنت و سابت الشقة و راحت تعيش في الفيلا عند باباها .
جرس الباب يرن - افتح الباب يا ممدوح ، أنا تعبت .
- حاضر يا ماما .
- أهلا يا حاج منور يا بابا .
- تعالي يا حاج شوف خيبة ابنك ، لية متمسك بثريا مراته بعد البهدلة دي كلها .
- يا ست هو أدرى بمصلحته ، بصراحة هو بيحبها و عايزها ، و بصراحة محدش هيرضي يعيش مع ابنك و هو مبيخلفش يعني عنده مشاكل صحية ، الله يخليكي سيبيه في حاله ، هو عارف هو عايز إيه ، ثريا لما بترتبط بحد صعب جدا تسيبه .
- خلاص إنت و أشرف اتفقتوا مع بعض ، إنتو حرين ، إللي بيشيل قربة مخرومة بتخر علي دماغة .
- يا ست افهمي ربنا يهدي النفوس و يجمعهم مع بعض تاني .
- هو ده الكلام يا بابا ، على فكرة أنا هرجعها في أقرب وقت حتى لو مصره إن البنت تعيش معانه .
و ع العموم البنت كده كده بتقولي يا عمو أشرف .
في القهوة
- يا حسونة إنت يا واد يا حسونة .
- أيوة جاي طلباتك إيه يا كمال أفندي .
- هات لي فنجال قهوة مظبوط .
- حاضر يا كامل أفندي يا ابن الناس يا متعلم .
- اسمعين : هو مين كمال أفندي ده يا حسونة .
- ده واد ثورجي من بتوع عايزين نغير عايزين حرية .
اسمعين ينظر لكمال أفندي بشدة و يوجه له الكلام . - و ماله إللي إحنا فيه مهو كل شيء زي الفل أهوه و كل حاجة متوفرة ، و الدنيا ماشية زي الورد ، ياكش بس إنتو عايزين توقعوا البلد .
- لا يا عم اسمعين مش ماشية زي الفل ولا كل حاجة زي الورد ، يعني إنت عاجبك زيادة الأسعار و الغلاء اللي إحنا فيه ، و العيشة الهباب إللي إحنا عايشنها .
- هباب على دماغك إنت يا كمال .
- متغلطش و احترم نفسك يا عم اسمعين .
- صحيح صدق الشاعر محمد كسبه لما قال في الرباعية بتاعته
اسكت خالص ما تتكلمش…. و اشكر ربك ع النعم
هو إنت إية ما بتتعلمش …. غير لما تاخد بالجزم
غيرك ياما قال و قال … و طلع كلامه وهم خيال
و هو عايش ف أحسن حال … ولا عمره في يوم إنظلم - بس دي مش رباعية يا اسمعين
- ياسيدي خليها ثمانية يا حسونة
- بس أنا معرفش الشاعر محمد كسبه و لا عمري سمعت عنه يا اسمعين .
- و أنا كمان معرفوش ولا عمري سمعت عنه يا حسونه . - كلامك ده معناه إيه يا عم اسمعين .
- يا عم غور جاتك خيبة إنت و إللي زيك شوية بهايم .
مالها البلد مهي زي الفل أهيه .
- إنت هتطبل يا عم اسمعين .
- لأ أنا مبطبلش ده الواد حسونة هو إللي بيطبل ، إنما أنا برقص ، طبل لي ياد يا حسونة ، رقصني ياد يا حسونة .
حسونة بيطبل و اسمعين بيرقص .
تي ترات تي ترات تربتت تت تيت تربتت تت توت .
التعليقات مغلقة.