قريب الباشا ” ١٨ ” الملهى الليلي بقلم : محمد كسبه
في بيت جمالات
- صباح الخير يا أمه .
- صباح الخير يا جمالات .
إنتي لمه المواعين و رايحة فين . - هو إيه يا أمه !!! ما إنتي عارفة أني كل يوم جمعة الصبح ، أنا و البنات بنغسلوا المواعين في الترعة و قبل العيد بنغسلوا السجاجيد برضه في الترعة ، إيه الغريب في كده !!!
- لا مش الحكاية بس الدنيا إتغيرت و الناس اتطورت ، ومحدش دلوقتي بيغسل في الترعة ، ده موضوع قديم يا بتي و بعدين لزمته إيه الشيل و الحط .
- يا أمه ما كنت زمان بروح معاكي ، و إني إتعودت على كده .
- بس أنا من زمان مبروحش يا جمالات .
- مليش دعوة هروح يعني هروح .
- يا بت إنتي في الترعة هدومك بتبقى مبلولة و بلتزق على جسمك و كل إللي رايح و إللي جاي بيبحلق فيكي و خصوصا إنك إدورتي و إحلويتي و بقيتي حاجة عسلية كدة .
- صحيح يا أمه يعني أنا حلوة و بقيت واحدة ست .
- يا بت ده إنتي في تالتة دبلوم و كل شوية يجيلك عريس و إنتي بترفضي ولا كنك بنت باشا .
- يا أمه ده كلك فلاحين و فقرا و أنا مش بحب الفقر ، أنا بحب العز و النغنغة يا أمه .
- على كيفك يا جمالات ، لسه بدري ، يا عالم يمكن نصيبك في واحد غني قادر يا كريم ياجمالات يا بت بطني تنولي إللي في بالك .
بس برضو لازم تنسي خالص موضوع الترعة ده .
باسم الأخ الأكبر لجمالات يستيقظ من النوم .
- إنتي يا بت يا جمالات ، لازم تنسي موضوع الترعة ده خالص .
- و إنت مالك يا وله ، أني حرة ، أعمل إللي أني عايزاه
- لا مش حرة يا جمالات ، و لو روحتي يا بت هضربك ، سامعة طولت اللسان يا أمه .
- طول بالك عليها يا باسم .
- لا يا باسم أني هروح غصب عنك و إنت مش هتضربني ولا حاجة .
- ليه بقى سحر يعني ولا إيه ؟
- لأ مش سحر يا وله دي أزهار .
أنا بروح مع البت أزهار و نرجس ، و إنت ما بتصدق تشوف أزهار دماغك بيطير و هي لا بتعبرك ولا هي طايقاك ، عشان إنت تقيل يا وله و رخم و معفن كمان . - طب خلاص واحدة واحدة كدة يا جمالات يا عسل .
- إيوة كده إعدل لسانك يا حمار .
- طاب هي أزهار جاية معاكي ؟
- مش هقولك و إنت مالك تيجي ولا متجيش !!!
- عشان لو قولت لك جاية بتجري تجيب الصنارة و تقعد جمبنا و مبنشبعش من كلامك الرخم .
- بصي يا جمالات هي لو أزهار هتيجي روحي معاها .
إنما لو أزهار مش جاية متروحيش .
و لازم تنسي موضوع غسيل المواعين في الترعة ده خالص فاهمه يا بت ؟ - أم جمالات : بقى هي دي المرجلة يا باسم ؟
- يوه يا أمه ،إنتي مش فاهمة حاجة خالص .
- لأ فاهمة يا روح أمك ، إنت عينك ع البت أزهار و أني عارفة من زمان .
- طاب ما تروحي تخطبيهالي يا أمه .
- أخطب لك إيه يا منيل و إنت حيلتك إيه .
ده إنت ملكش شقة و كمان مفيش تراخيص مباني !!!
طب أصبر لما ربنا يفرجها من عنده . - على بال ما أصبر تكون البت اتجوزت و خلفت .
- اسكتي يا أمه ملوش لازمة الكلام .
- يا جمالات يا بتي اقعدي ما تروحيش ، أنا مش عايزة حد يبص لك بنظرة وحشة .
- خلاص يا أمه ، المرة دي و خلاص .
. بس موعدكيش ، ممكن أكررها تاني . - أنا فهمتك و إنتي حرة .
- يا أمه دنا جمالات ، يعني ب ١٠٠ راجل .
و ميملاش عيني أي حد . على الباب البنات أزهار و نرجس . - يا جمالات إنتي يا بت يا جمالات يلا بينا .
- ناوليني يا أمه المواعين .
- طاب سيبيهم و أنا هغسلهم .
- يا أمه حتى لو المواعين نضاف أنا هاخدهم أغسلهم برضه في الترعة .
- عجايب أنا بطلت الموضوع ده من سنين السنين لم المية دخلت البيوت و البت لها مزاج تغسل المواعين في الترعة ، قطع المواعين على إللي بيغسلوها .
- يا أمه … يا أمه هي فين الصنارة أنا مش لاقيها .
- روح يا باسم كده أنا مش ناقصاك إنت كمان .
العيال اتهبلت . - في الملهى الليلي .
- سو سو …. يا سوسو .
- أيوة يا عزيز باشا .
- بقولك إيه ، ابعتيلي البت الجديدة زيزي .
- يا باشا بلاش سكة البت دي ، دي بت ناس و محترمة .
- بقول لك إيه ، مفيش في شغلنا حد محترم ، محترمة إزاي و هي بتشتغل في كبارية .
- يا باشا هي شغالة في الصالة ، بتقدم طلبات للزباين بس .
- يعني هما الزباين هنا ملايكة ، ما كلك ولاد ستين في سبعين ، أنا سايبها بمزاجي ٣ شهور المفروض تكون اتعلمت ، و لا باين كده إنتي بتغيري منها .
- مش موضوع غيرة ، هي شغالة عشان بتصرف على إخواتها .
- يا بت و أنا مالي إنشاله تصرف على بلد ، و بعدين مفيش حاجة ببلاش ، مانا هزود دخلها .
- يا باشا عندك كتير غيرها في الصالة .
- لأ … أنا عايزها هي و إنتي مالك ، غوري بقى اندهي لها .
- حاضر يا باشا إنت حر و أنا مالي .
زيزي تشير إلى حارس الأمن ياسر .
- ياسر .. ياسر
- أيوة يا زيزي فيه إيه ؟
- أنا مش قولت لك يا ياسر ، إن عزيز باشا عينه عليا ، الراجل ده مش مظبوط .
- هو ميعرفش إنك مراتي مفكرك مش متجوزة .
- طاب ما تقوله ، خليه يحل عننا .
- لا مش هينفع ، ده يطردني من الشغل .
إنتي عارفة إني شغلتك هنا معايه ، و مخلي بالي منك ، و عيني عليكي .
معلش استحملي الكام شهر دول لحد ما أسد ديون العفش و الشقة ، و بعد كده و الله ما هتقربي ناحية أي شغل في أي مكان تاني . - يا ياسر شكل موضوع الشغل هنا مش هينفع .
- يعني إيه !! عايزاني اتحبس ، دنا عليا ١٧٥ الف جنية و مرتبي على مرتبك هنقدر نسدد الفلوس إللي علينا .
- سوسو : يا زيزي تعالي كلمي عزيز بيه .
- شوفت بقى !!! عزيز بيه عايزني في المكتب ، أعمل إيه ؟
- روحي و خلي بالك من نفسك و إذا حصل منه حاجة اندهي لي بسرعة .
- أيوة يا سوسو حاضر أنا جاية أهوه .
أيوة يا باشا أوامرك ، تحت امرك يا باشا . - حبيب قلبي ، يا عيون قلب عزيز ، أنا إللي تحت أمرك ، بقى الجميل ده بيشتغل هنا ، و ميعديش على عزيز .
- مش فاهمة إنت عايز إيه يعني ؟
- لأ إنتي فاهمة بس بتستعبطي .. صح .
أنا عايز حبة ملاطفة ، كلمتين حلوين ، شوية دلع .
و يقترب منها و يضع يده على خصرها .
بدون إنذار تصفعه زيزي على خده و تصفعه الثانية . - يا بت الكلب جاية هنا تعملي شريفة على عزيز ، طاب و حياة الست الوالدة لأرميكي رمية الكلاب .
و ينهال عليها بالضرب .
تقع على الأرض و تبكي ، يدفعها بساقه خارج المكتب . - يا أمن … يا أمن …. شيلوا الحرامية دي ارموها بره .
- زيزي : طاب هات مرتبي … هاتي فلوسي .
- مرتب إيه اطلعي بره يا كلبه .
- هو فين الأمن .
ياسر ينظر إليه بغضب و يقول
- حاضر يا باشا أوامرك يا عزيز بيه ، اتفضل ادخل مكتبك و أنا هنصرف بطريقتي .
- مشيها يا ياسر ،
ياسر يغلق عليه المكتب ، و يحضن زوجته و يبكي ثم يستأذن من زميله نصف ساعة كي يوصل زوجته للشقة .
في الطريق للشقة التزما هما الإثنين الصمت .
في الشقة .
- و حياة النبي لأجيب لك حقك تالت و متلت .
- لا يا ياسر ده راجل مفتري و هيطردك إنت كمان ، و مش هيديك مرتب الشهر ده و نبقى إحنا الاتنين في الشارع .
- لا مش هسيبه و الله لازم أربي عزيز ابن الكلب ده .
لو مكانتش الفلوس كنت قتلته ، بس هو هيروح مني فين .
التعليقات مغلقة.