قريب الباشا ” ٢٢ ” شجرة الجميز بقلم محمد كسبة
بعد العشاء في القرية
أم نعسة : هي البت نعسة إتاخرت كده ليه هو فيه درس بيقعد لبعد العشا ، هي البت دي راحت فين ،؟
معرفش ليه قلبي مخطوف و قلقانه عليكي يا نعسة
استر يا رب .
بس لازم اتصل على مني زميلتها الاول .
- ألو إزيك يا منى .
- إزيك يا طنط
- هي نعسة عندك .
- لا يا طنط أنا مشوفتهاش من بعد المدرسة .
- يا خراااابي دي قالت إنها رايحة درس معاكي .
- لا يا طنط إحنا معندناش دروس النهارده .
- طب اتصلي بزمايلكم عشان تعرفي هيا فين و تبلغيني .
- حاضر يا طنط .
أم نعسة : لا أنا مش هقعد كده ، لازم أطلع أدور ع البت .استر يا رب . - يا ولاد ، يا ولاد ، حد شاف نعسة ، البت إتاخرت و الساعة داخلة على ٩ .
- أحد الجيران : اتصلي بيها يا أم طارق .
- اتصلت يا أختي و التليفون مش بيرد ، إظاهر كده مفيش شبكة .
- طاب هي بتاخد درس عند مين ؟
- مش عارفة هي خدت كراسة الرسم و الألوان .
- هي بتاخد درس رسم ؟
- لا …. بس معرفش هي خدت الكراسة والألوان ليه .
الستات في العزبة
- تستاهل خليها تشرب يامه نصحناها تخلي بالها م البت .
- يا إختي البت ماشية على حل شعرها .
- أدي أخرة المشي العوج و اللبس المسخرة و الفلوس اليامه إللي في إيدها .
الشائعات تتردد في البلد
تلاقيها هربت مع واحد
ولا تلاقيها اتخطفت
يمكن سافرت لقرايبها
هي البت دي أصلا مش مظبوطة و ماشية براحتها .
- اسكتوا اسكتوا أحسن أم نعسة جاية علينا .
- يا ولاد … يا أهل البلد بتي نعسة مش لاقياها ، مجتش لحد دلوقتي ، الساعة ١٠ و هي مش باينة و أنا خايفة عليها ، تليفونها مش بيرد ، استر يا رب .
أهل القرية - أنا كنت شايفها بتزعق لإسمعين .
- لأ دي كات واقفة مع الواد بتاع التوكتوك الوله حامد .
- لا يا خالة دي كات بتشتري من دكان الواد أسامة .
- لا تكون اتخطفت يا خالة عشان الدهب إللي لابساه و لا عشان المحمول الغالي إللي ف إيديها .
- يا نهار إسود بتي نعسة اتخطفت !!!!
يا لهوووووي إنتي فين يا نعسة .
يا ترى إية إللي حصل لك يا نعسة .
با ولاد حد يطمني ع البت أني هتهبل عقلي هيطير .
- بصي يا خالة إعملي محضر في المركز إنها متغيبة . - بلا بينا و ماله أعمل محضر معملش ليه .
أهوه خالها جه أهوه يلا بينا يا عوض نعمل محضر في المركز . - يلا بينا بس ندور الأول .
- مانا بدور م الصبح مش لاقياها .
في مركز الشرطة .
- يا باشا أنا بتي متغيبة من الساعة ٤ العصر لحد دلوقتي الساعة ١١ مش باينة ،أنا عايزة أعمل محضر إنها متغيبة ولا مخطوفة .
- الأمين : لا يا حجة مينفعش تعملي محضر إلا بعد ٢٤ ساعة .
- يعني إيه مش هتساعدوني .
- القانون كده يا حجة ، البلاغ بعد ٢٤ ساعة من التغيب .
- قانون إيه و كلام فارغ إيه !!!
- أنا عايزة بنتي .
كل الصفحات على الفيس بوك تعلن عن إختفاء نعسة
أهالي البلد ينتشرون في كل مكان بالقرب من الترعة و على النيل و على الطريق الزراعي و علي جانبي الطريق الرئيسي للعزبة الكل يبحث عن نعسة .
النبابيت مشتعلة في أيديهم و مازال البحث جاري ، في تمام الساعة الثانية و النصف صباحا قبل الفجر ، تم العثور عليها مقتولة بالقرب من الساقية المهجورة أسفل شجرة الجميز .
عم حسان يتصل بحسام باشا
حسام باشا : أيوه يا عم حسان فيه إيه ع الصبح ، ده وقت تتصل فيه عليا ، طاب كنت خليك الصبح .
- مينفعش يا حسام باشا ، ده أمر مهم و ضروري ، عندنا جريمة قتل .
- با ساتر يا رب ، جريمة قتل ، قولي بسرعة مين و إزاي و فين و إيه إللي حصل ؟
- بت في تانية اعدادي اتقلت عند الساقية المهجورة ، تحت شجرة الجميز في العزبة .
- حاضر أنا هتصل بالمأمور و بالإسعاف .
- بسرعة يا حسام باشا .
ألو سيادة المأمور .
- صباح الخير ، إزيك يا حسام باشا ، ده وقت تتصل فيه ، مينفعش كده يا حسام باشا .
- آسف و الله بس الموضوع ده مش محتاج تأخير .
فيه بنت مقتولة عند الساقية تحت شجرة الجميز في آخر عزبة العزايزة . - إيه بتقول إيه جريمة قتل !!! أقفل دلوقتي .
يا عسكري جهز لي البوكس و هات الرجالة و تعالى .
حسام باشا يتصل بالإسعاف .
في القرية صوت البوكس يشق صمت الليل و صوت سيارة الإسعاف يثير الخوف في النفوس .
آذان الفجر ينطلق مع صرخات أم نعسة و نساء القرية .
بعد الإجراءات الأمنية تم نقل الجثة المشرحة .
حسام باشا مع الدكتور في المشرحة .
- إيه الأخبار يا دكتور .
- زي ما إنت شايف كده .
- اغتصاب وفض غشاء البكارة و طعن في الكبد و المعدة أدي إلى نزيف و هبوط حاد في الدورة الدموية .
في قسم الشرطة
- يا اسمعين إنت قتلت نعسة لية ؟
- أنا مفتلتهاش يا باشا .
- اومال تفسر بإية الدهب بتاعها إللي لاقوه عندك في الأوضة .
- لا حول ولا قوة إلا بالله ، أنا لا سرقت ولا قتلت يا باشا ، هو أنا لو سرقت الدهب كنت هحطه في الأوضه عندي يا باشا !!!
- بس التحريات بتقول إنها كانت بتزعق لك إمبارح ، و إنت كنت ماشي وراها .
- يا باشا هي البت نعسة أنا قابلتها إمبارح بعد العصر و كانت ماشية بطريقة مش كويسة ، بصراحة أنا هزقتها عشان تمشي كويس ده إللي حصل .
- يعني مش هتعترف .
- لا يا باشا أنا مش هتعرف بحاجة معملتهاش .
- يا ابني اعترف و خلصنا ، و أنا أوعدك نساعدك و هتاخد حكم مخفف .
- لا إله إلا الله عايزني اعترف بحاجة معملتهاش يا باشا .
- يا عسكري دخل المتهم في الحجز .
- حاضر يا باشا
- هاتولي البت مني زميلتها .
- مني تبكي و تقول : يا باشا أني مظلومة معملتش حاجة و معرفش حاجة .
- أبو مني : يا باشا بتي كات صاحبتها و ماشية معاها بس ، باي لا قتلت ولا سرقت يا باشا .
- اتكتم يا راجل إنت مش عايز اسمع لك صوت بدل ما هشحتك بره .
- اتكمت أهوه يا باشا .
- يا مني إنتي متهمة بسرقة و بقتل زميلتك نعسة ؟ التحريات بتقول إنك كنتي بتمشي معاها على طول و كنتي ملزماها دايما و كان بتعرفك كل صغيرة و كبيرة عنها .
( تتكلم مني بصوت مرتجف )
- صحيح يا باشا هي كانت صحبتي و حبيبتي بس أنا معرفش حاجة عن القتل ولا عن السرقة .
- طاب إيه إللي تعرفيه عن الموضوع ده .
- كان فيه واحد اسمه حامد سواق توكتوك ، كان عايز يصاحبها ، لأ … كان عايز يخطبها ، و قالي أفاتحها في الموضوع ده .
- أبو مني : يا بت الكلب إنتي بتكلمي شباب ، نهارك إسود و سنتك هباب بس لما تروحي الدار . - اتكتم يا راجل إنت بدل ما أطلعك بره .
- حاصر يا باشا اتكمت اهوه .
- و بعدين يا مني إيه إللي حصل .
- هي موافقتش علي شكله … معجبهاش .
- عشان كده قتلها و سرقها ؟
- معرفش يا يا باشا ، هو قالي كلمهالي و أنا كلمتهاله وهي رفضته و خلاص .
- هل لديك أقول أخري ؟
- مش فاهمه .
- بعني عايزة تضيفي حاجة .
- لا يا باشا هو ده كل إللي أعرفه .
- يا عسكري : دخل الرجالة كلك في زنزانة و فضي لها زنزانة لوحدها .
بعد اسبوعين في القهوة
- الواد حسونة : احمد ربنا يا اسمعين ، ده إنت كنت هتتعلق على حبل المشنقة ، سرقة و قتل و اغتصاب.
- حبل مشنقة إيه يا جدع .
هو أنا عملت حاجة ، أنا لا قتلت ولا سرقت ، أنا نصحت بس و يا ريتني ما نصحت ، أدي نتيجة إللي ينصح حد . - طاب إيه إللي حصل احكيلنا يا اسمعين .
- احكي لكو إيه ما إنت عارفين كل حاجة .
و ع العموم أنا هقولك عشان الناس تعرف الحقيقة يا حسونة . - أيوة قول الناس عايزة تفهم .
- الحمد لله الواد حامد إللي سرق المحمول منها , هو إللي أنقذني من المصيبة دي .
- إزاي يا اسمعين نقذك إزاي ؟
- البت نعسة كانت بتحب واحد و بيبعت لها رسايل ع الواتس إنه بيبحها و كده و هي كانت متجاوبة معاه .
و بعدين لما مسكوا الواد حامد هو كان باع المحمول في البلد لصاحب محل ، هو اتعمل له قضية سرقة و صاحب المحل اتعمل له قضية اتجار في المسروقات . - يا ولاد اللذينه يعني ده يسرق و ده يبيع .
- ما علينا فتحوا المحمول لقوا صاحب المحل مفرمته نهائي و ماسح كل إللي عليه .
- طاب و بعدين عملوا إيه يا اسمعين .
- قال الواد حامد كان واخد الخط في جيبه و الحمد لله إنه مرماش الخط ولا كسره .
- ليه يعني واخد الخط ليه ؟
- عشان يعرف هي بتكلم مين و يهددها بيه .
- يعني كان عايز يمسك عليها ذلة يا اسمعين .
-ربك أعلم يا حسونة
الباشا خد الخط منه و حطه في المحمول بتاعه و فتح منه الواتس بتاع نعسة و عرف رقم الولد و اتصل بمباحث الإنترنت ، جابو له اسم صاحب الخط و كل التفاصيل ما بينهم الرسائل المحذوفة كمان . - و جابو الواد إللي قتل يا اسمعين ؟
- إبوة يا حسونة جابوه و طلع الاستاذ هاني إللي كان شغال في الحضانة و المديرة بتاعت الحضانة رفدته .
- هي رفدته !!!
- إبوة رفدته لأنه كان مش كويس مع العيال الصغيرة .
المهم هو استدراجها بحجة إنه هيعلمها الرسم ، و اتفق معاها تقابله عند الساقية قبل المغرب عشان يعلمها رسم غروب الشمس . - و بعدين يا اسمعين .
- البت راحت قعدوا يحكوا لبعض و يسمعوا اغاني الواد سخن واحدة واحدة عمل إللي عمله بالعافية و كان معاه مطوة هددها بيها .
خاف من الفضيحة بعد البت ما هددته إنها هتفضحه فقام قتلها و سرق الخاتم و الغويشة و الحلق و السلسلة و هرب .
لما هرب فكر إنه يلبسني في الموضوع ده . - عمل إيه يا اسمعين ؟
- الواد ابن اللذينه يا حسونة ، نط على سور الفيلا و دخل أوضتي من الشباك بعد ما فتحه بالمطوة و حط الحلق الدهب تحت المرتبة عندي .
- طاب و بقيت الدهب وداه فين ؟
- هو إنت حمار أناش عرفني .
- المعلم شرف : جاتك الهم عيل حمار
- انت كان مالك ومال البت لا تنصح ولا تفضح خليك في حالك و سيب الملك للمالك .
- أيوه و الله يا معلم لا تنصح ولا تفضح صدق إللي قال خدوا الحكمة من أفواه المجانين .
- بقى أنا مجنون يا ابن الكلب ، طاب غور في داهية .
- انا ماشي أهوه ، إلهي يا قادر يا كريم تتحط مكان مانا كنت .
التعليقات مغلقة.