قريب الباشا ” ٢٤ “
تماثيل فرعونية
تأليف : محمد كسبه
في الفيلا ممدوح باشا يتصفح الفيس بوك
- أيوة الله عليكي هو ده الكلام يا داليا تستاهلي أحلى لايك ، و كمان الصورة دي لازم تاخد كومنت .
أدي أحلي قلب و التعليق عسووووولة .
ياااااه كنتي فين من زمان يا داليا بس لو كنتي كبيرة شوية . - إيه ده أبو عمر !!!
لا إنت بقى دلوقتي لازم تاخد أحلى بلوك ، هو كل شوية تنزلي فيديوهات و أدعية دينية ،عدننا في العزا ، خلاص كده إنت جبت أخرك معايه يا أبو عمر ، مش كفاية البوستات الحزينة ، لأ ده كمان من تقل دمه كل شوية يبعت لي ع الماسنجر رسايل دينية .
و الله إنت إللي جبته لنفسك ، يلا مع السلامه أحلي بلوك . - إيه ده في حد باعت لي رسالة ، أوعى يكون أبو عمر ، إية ده الصورة فيها تماثيل صغيرة فرعونية .
مين إللي باعت لي الصورة دي .
ده واحد اسمه أيسر المنياوي .
أيوة بس أنا معرفوش ، ما علينا .
رسالة : إيه يا عم أيسر إنت تعرفني عشان تبعت لي رسالة ع الماسنجر .
رسالة : مش إنت ممدوح عبد العزيز .
رسالة : لا يا سيدي أنا ممدوح عزيز ، إنت تعرفني منين ، عشان تبعت لي الرسالة دي .
رسالة : معلش الرسالة وصلتك بالغلط أنا كنت هبعتها لممدوح عبد العزيز .
رسالة : هي الصورة إللي إنت شايل فيها تمثال فرعوني في أوضة زي ما تقول مقبرة كده تبقى صورتك .
رسالة : أيوة يا باشا صورتي .
رسالة : طاب و التمثال ده أصلي ولا مضروب .
رسالة : لا طبعا تمثال أصلي .
رسالة : لا إنت كداب ياله .
رسالة : لا يا أبو عمو أنا من المنيا و بنشتغلوا في العرايس الدهب زي ما إنت شايف .
رسالة : بس دي تماثيل فرعونية صغيرة .
رسالة : لا يا أبو عمو إحنا بنسميها في شغلنا عرايس دهب ، معلش أنا مضطر ألغي الدردشة لأنها جاتلك بالغلط .
رسالة : لأ … لأ .. غلط مين ،ده إنت جيت في وقتك .
بس إنت بتضحك عليا دي تماثيل مضروبة يعني شوية حجارة .
رسالة : لا مش حجارة دي أصلية .
رسالة : و أنا إيه إللي عرفني إنها أصلية ، طاب ما إنتوا في شغلكوا لكم ناس بتتعاملوا معاهم .
رسالة : الناس إللي بنتعامل معاهم مغطسين شوية اليومين دول و إحنا بعتنالهم و عرفناهم عشان يبعدوا شوية لحد الدنيا ما تهدا .
رسالة : يعني إيه يا عم ؟
رسالة : يعني إحنا في شغلنا بنحتاج وجوه جديدة لانج محدش يعرفهم ولا يسمع عنهم قبل سابق ، و كمان هنديلك البضاعة و هنعرفك تبيع لمين و بكام .
رسالة : طاب و إنتوا مش بتبيعوا لهم على طول ليه .
رسالة : عشان لازم يكون فيه وسيط بين إللي بيطلع الأثر و بين إللي بيشتريه و يسفره بره ، و مينفعش نتعامل مباشر .
رسالة : الكلام ده أونطة و نصب و كله بلح و إنت بتشتغلني و أنا مش مقتنع يا عم أيسر .
رسالة : طاب ثواني كده أنا هصور لك فيديو دلوقتي مباشر من داخل المقبرة إللي فتحناها من إسبوع .
رسالة : معلش أنا عايز أشوف الرجالة إللي معاك و إنت مغطي وشك ليه ؟
رسالة : يا أبو عمو هو النظام كده أنا إللي ببان في الفيديو و بخبي وشي ، ثواني بقى ، كده إنت شايف الشغل إللي في المقبرة .
رسالة : أيوة شايف إية ده … ده أوضة حيطانها من الحجارة و منقوش عليها فرعوني .
إيه ده كله …. إيه ده كله … إيه التماثيل الدهب و التماثيل الحجارة الصغيرة دي كلها ، إنت قفلت الفديو ليه ؟
رسالة : خلاص وقتك خلص معايه ، اتصل على الرقم ده ٠٠٠٠٧٠٠٦٥٠٤
ممدوح : الواد مش بيرد و قفل الدردشة
طاب أنا هفتح الفيديو تاني .
إيه ده يا ممدوح ده مش ممكن يكون مضروب دي تماثيل أصلية ، لأ عرايس دهب أصلية زي ما بيقولوا .
طاب كده لازم أتصل بسرعة ع الرقم . - ألو سلام عليكم إزيك يا عم أيسر .
- لا أنا مش أيسر أومال إنت مين ؟
- أنا أيمن المنياوي ، أيسر شغله معاك انتهى ، الشغل كده معايه .
- تمام يا عم ايمن ، إنتوا حذفتوا الدردشة ليه ؟
- معلش يا أبو عمو من باب الأمان .
- إنت صح كلامك صح لازم تخافوا .
- مش حكاية خوف ، إحنا قلبنا ميت ، بس كل لعب و له أصوله .
- طاب أنا عايز أشيل الشيلة دي كلها ، يعني آخد الآثار إللي عندك كلها .
- براحة علينا شوية ، محدش بياخد الكمية دي كلها ، أي حد جديد معانه بياخد حتتين تلاته ، على حسب ما إحنا بنقسم .
- يعني إيه مش هختار ؟
- يعني بس يا ابو عمو ، إنت هتقولنا إنت عايز عرايس دهب ولا حجارة ؟
- حجارة إية يا عم ، أنا مليش في شغل الحجارة أنا هاخد عرايس دهب .
- يعني إنت اشتغلت قبل سابق في الآثار .
- أومال إيه ، أومال إنتوا وصلتولي إزاي يعني ؟
- بعني هتعرف تبيع الشغل .
- أكيد طبعا .
- طاب أنا هقولك على تاجر هياخد منك الشغل ، و هو إللي بيقيم و بيقدر الشغل و مفيش فصال خالص ، زي ما هيقولك هتبيع ، ولازم تعرف حاجة … التاجر إللي بيشوف الحاجة بياخدها …. يعني بتبقى بتاعته رسمي ، يعني مينفعش تعرض البضاعة على تاجر و اتنين و تلاته ، هو إنت بتتصل بفلان يبقى هو ده إللي هيشتري منك بس و لو مبعتلوش يبقى عمرك انتهى .
- لا لا ياعم إنا مليش في الشغل ده ، إنتوا هتدوني البضاعة و أنا هعرف أبيعها بطريقتي .
- تمام يا ممدوح خد الرقم ده اتصل عليه ٠٠٩٠٠٠٨٠٧٧٠٠
إنت بتقفل ليه ، هو الناس دي كل شوية يدوني رقم جديد ، ع العموم ماشي نتصل على الرقم .
- ألو يا عم ايمن .
- أنا مش أيمن ، ولا أيسر المنياوي .
- أومال إنت مين يا عم ؟
- أنا شملول المنياوي .
- يعني إيه شملول ؟
- يعني بلم الشمل و بجمع الحبايب .
- آه … فهمت .
- بص يا ممدوح باشا ، عشان بس تعرف ، إحنا كل واحد مننا في مكان بعيد عن التاني عشان الامان .
- فهمت ، طاب أنا عايز أشتري حتتين يا عم شملول .
- مفيش إلا الحتتين دول إللي هيناسبوك .
- فيه رساله دلوقتي وصلتك ع الواتس فيها فيديو و صور للعروستين الدهب بتوعك .
- تمام أنا فتحت الفيديو لقيت تمثالين دهب صغيرين ، قصدي عروستين دهب ، إيه المطلوب يا عم شملول ؟
- المطلوب مهر العرايس مليون جنية ، بس عشان دي أول مرة تتعامل معانه .
- مليون جنية على عروستين كتير يا عم شملول !!!!
أومال أنا هبيعهم بكام ؟
مانا لازم أعرف تكسب كام ده شغل و دي فلوس عالم هتندفع أومال إيه . لازم نحط النقط ع الحروف ؟ - يا عم ممدوح دول يتباعو مش اقل من ٢ مليون دولار .
- بااااه يتباعوا ب ٢ مليون دولار ، ده رقم كبير أوي .
- أومال إنت مفكر إيه إحنا لازم نشبع إللي بيشتغل معانه .
- بس برضه المهر المليون جنية كتير عليا ، أصل الظروف ما تسمحش بالمبلغ ده يا عم شملولي .
- بص يا ممدوح ، إحنا بنبيعهم للتجار تبعنا ب ٣ مليون جنية ، بس عشان الظروف و الداخلية إللي مديقة علينا في الشغل و مش سايبانه في حالنا ، إحنا عملنالك خصم ، وع العموم هات إللي معاك و الباقي بعد شهرين .
- لا أنا مش بحب يبقي عليا فلوس لحد .
- طاب معاك كام ، و خلص متطولش في المكالمة .
- معايه ٦٩٠ ألف جنية كاش إيه رأيك ؟
- خليهم ٧٥٠ الف جنية و الكلام خالص ، خد الرقم ده اتصل عليه ٣٠٠٠٦٠٠٧٠٨
- إنت قفلت ليه يا عم شملول ، دوختوني الله يخرب بيوتكم إيه الاسماء دي أيسر و أيمن و شملول ده باين عليهم عصابة ياد يا ممدوح .
لا مش عصابة دول تجار آثار و بيطلعوا آثار من تحت الأرض و بيبعوها ، بس البوليس مديق عليهم الخناق و بيبيعوا الحاجة بأقل من نص تمنها .
في الجبل
- الله ينور عليكم يا رجالة .
- كويس لقينا العريس المناسب للعرايس بتوعنا ، لا و إيه هيدفع كاش يا عم دوغري .
- مسحتوا الدردشة و الفيديوهات .
- تمام كله اتمسح يا كبير .
- بس ده ممكن يكون عمل اسكرين شوت .
- هو لما هيجي هناخد منه التليفون بتاعه و ياخد الشغل و هو حر يبيع ما يبيعش ربنا يسهل له الحال .
- احنا هناخد حقنا و هو هياخد العروستين حلال عليه يا معلم دوغري .
هههههههه - اومال هو ما اتصلش بيا ليه يا رجاله ؟
- تلاقيه هيتصل كمان شويه ، يمكن الرصيد معاه خلص .
- براحته سيبويه براحته و محدش يكلمه نهائي و لو اتصلت بحد فيكم محدش يرد لا ع النت و لا على التليفون تمام يا رجالة .
- تمام يا معلم دوغري .
-
التعليقات مغلقة.