قريب الباشا ” ٢٥ ” الدوغري تأليف : محمد كسبه
في الفيلا
ألو أنا ممدوح عزيز مين معايه ؟
معاك دوغري القناوي .
يعني إيه دوغري ؟ و ليه قناوي مش منياوي زي زمايلك ؟
دوغري عشان أنا إللي هخلص معاك و أنا إللي هسلمك البضاعة .
و قناوي ليه بقى ؟
انت بدأت تفهم يا ممدوح ، قناوي عشان هتستلم في قنا .
آه … يعني هما هيطلعوا العرايس من المنيا و أنا هستلم في قنا .
بص يا ممدوح باشا ، العروستين الدهب بتوعك جاهزين و ب ٧٥٠ ألف و التسليم الساعة ٣ بالليل في الكيلو ٤٣ في قنا .
يعني إيه ؟
اسمع كلام عمك الدوغري للآخر يا ممدوح و متقاطعنيش .
طاب ثواني أجيب ورقة و قلم …… قول يا ريس دوغري .
الساعة ٣ بالليل في الكيلو ٤٣ في قنا ، هتقف بالعربية إللي هتجيبك عند طرب ( مقابر ) السواحل .
هتلاقي عربية واقفة قدامك و هتديك كلاكس مرتين و هتنور لك مرتين بس .
إيه ده يعني صوت وضوء !!!! هو إحنا في أبو الهول .
اسمع يا واد و متقاطعنيش بلاش كلامك الماسخ ده
حاضر ياعم دوغري و النبي ما تزعل .
لما العربية بتاعتنا تديلك الإشارات .
هتمشي وراها بعربيتك لحد ما تدخل الخن بتاعنا .
خن يعني إيه خون يا معلم .
خون يعني الجحر بتاعنا في الجبل .
يعني أنا مش هستلم من المقبرة .
لا طبعا .
دنا كان نفسي أشوف المقبرة كلها .
اسمع بقى و اسكت متقاوحش يا ممدوح ، إنت هتاخد إللي يخصك بس ، زي ما شوفتهم في الفيديو .
متتأخرش و متتصلش بحد و جهز نفسك ، إوعاك تلعب بديلك إللي بيعرف سرنا بيبقى واحد مننا و إللي بيخلف كلامه يعتبر نفسه ميت .
خد الرقم ده لما تكون عند الكيلو ٤٣ اتصل عليه
ماشي ابعت الرقم
٠٠٩٠٠٣٤٠٠٥٦٠٠
بس إنت كده بتهددني ، ألو …. ألو … يادي النيلة قفل السكة .
ممدوح في الفيلا
يا اسمعين … ولا يا اسمعين .
أيوة يا ممدوح باشا يا ابن عمي .
عايز أخد رأيك في موضوع كده .
يا سلام يا ولاد الدم بيحن ، قول يا ابن عمي .
هو إنت ليه يا اسمعين كل شوية تقولي يا ابن عمي ؟
هو إنت تطول . مهو إنت ابن عمي أصلا ، بس ابن عمي داير .
ماشي طاب فهمني اكتر عشان أخد بالي .
مهو جدي وجدك كانوا ولاد عم ، و كانوا بيلعبوا قمار مع بعض ، فجدك كسب جدي في القمار و خد منه كل حاجه ، فجدي جات له جلطة و مات فيها ، و بعدها بشهرين أبويا مات من كتر الديون إللي مش عارف يسدها ، مات بالسكتة القلبية .
يا عم اسمعين بطل اشتغالات .
قوم إيه أبوك عزيز باشا خدني و أنا صغير و إداني للخدامين ، و لما كبرت اشتغلت معاهم خدام عندكم راجل رمه الله يخرب بيته .
طاب و أمك فين .
أمي راحت عند أهلها و اتجوزت و كات بتيجي تزورني و بعد كده ماتت .
يا اسمعين إنت بتحكي في إيه مين إللي قالك الكلام ده .
الكلام ده البلد كلها عارفاه يا ممدوح .
ما علينا و الله لو أنا مش محتاج لك لكنت شحتك بره الفيلا عشان طولت لسانك يا اسمعين .
طاب هات فلوسي إللي عندك ٢٣ الف و سبعمية و خمسين جنية زي ما هما متقيدين في النوتة بالظبط .
اقعد بس يا ممدوح أنا هقولك على موضوع هيخلينا نلعب بالفلوس لعب .
بجد يا دوحة يعني أنا هلعب معاك بالفلوس !!!
طبعا ما إنت هتبقى شريكي و الناس إللي إدوني فلوس هياخدوها و هياخدوا الأرباح بسرعة في لعبة صغيرة كده .
لعبة صغيرة هو إنت واخد الفلوس عشان تلعب بيها يا ممدوح .
يا اسمعين افهم .
انا هشتري عروستين دهب .
يا مثبت العقل في النفوخ يا رب ، هتشري عرايس و كمان دهب .
آه يعني هنشتري آثار و نبيعها .
اسكت يا غبي و قول عرايس دهب .
إيه رأيك يا اسمعين ؟
رأي ؟ و أنا راي يهمك في إيه ؟
يا عم قول رأيك و خلاص بلا يهمني بلا ميهمنيش .
رأي ده كلام فارغ … و كلام فاضي .
لا مش كلام فاضي ، شوف الصورة دي يا اسمعين ، و كمان شوف الفيديو ده .
أنا نزلتهم بسرعة قبل ما يحذفوهم .
أيوه الله العرايس دي شكلهم حقيقي ، دول مش ممكن يكونوا مغشوشين أبدا .
إيه رأيك يا اسمعين ؟
توكل على الله يا ممدوح .
خلاص اعمل حسابك تيجي معايه تستلم البضاعة ، بس شوف لنا سواق ابن حلال ياخد أجرته و يكون أمين يوصلنا هناك .
حاااضر سيب الموضوع ده عليا ، سهل قوي السواقين على قفا مين يشيل ، دول زي الهم ع القلب .
تاني يوم ، يوم التسليم
يلا بينا يا ممدوح السواق جاهز و مدور العربية تحت الفيلا .
ثواني يا اسمعين .
ثريا : إنت رايح فين يا ممدوح ؟
رايح مشوار كده في السريع و جاي علطول .
أنا قلقانة عليك مش عارفة ليه يا دوحة ؟
متخافيش لا إله إلا الله .
مع السلامه ، محمد رسول الله
ميان : مع السلامة يا بابا ممدوح خدني معاك .
مع السلامة يا ميان بكره باذن الله هنتفسح سوا .
بالقرب من مقابر قنا
-السواق : يا ممدوح باشا إحنا خلاص قربنا المقابر هناك أهيه .
-يا اسمعين أصحا بقى ، إحنا وصلنا المقابر أهيه .
-اسمعين : أيوة صح وصلنا دي السكة طويلة قوي .
إنت شايف إللي أنا شايفه ، العربية واقفة هناك تحت الشجرة أهيه يا ممدوح .
ممدوح سامع صوت الكلاكس مرتين اهوه ، شايف أدي النور نور مرتين اهوه .
اسمعين : كده إحنا في السليم و كله تمام توكلنا على الله .
امشي ورا العربية دي يا أسطي .
تمام أنا وراها بالظبط اهوه .
إيه ده يا ممدوح فيه صوت ضرب نار إتصل لنا بالدوغري شوف إيه اللي بيحصل ده .
ألوه سلام عليكم يا حاج دوغري .
إزيك يا ممدوح جبت الفلوس .
انا تمام إنت جبت البضاعة .
عيب عليك البضاعة عندنا كتير و إنت طلبك في الأمان .
هتاخد البضاعة و نأمنوك لحد أول الطريق وإنت راجع .
إيه ضرب النار إللي ورانا ده يا دوغري ؟
لا متشغلش بالك ده التأمين لنا و لك ، دول رجالتنا .
بس إيه ده ،أنا سامع صوت دبابه .
هههه يا عم ممدوح ضرب النار و الديابة دي إشارات بتاعتنا .
يعني إيه مش فاهم ؟
-يعني كمل ورا العربية متخافش .
-اسمعين : يلا بينا يا ممدوح نرجع إللي بيحصل ده ميطمنش .
-نرجع إزاي يا اسمعين ده فيه عربية قدامنا و عربية ورانا .
شكلنا كده هنتعمل فسيخ ، ما علينا مقدمناش إلا نكملوا .
يا ريس دوغري الرجاله وصلوا .
دوغري القناوي و الرجالة كلهم ملثمين في إستقبال ممدوح و اسمعين
يا الف مرحب ، يا ألف مرحب نورت يا ممدوح باشا .
منورين يا رجالة فين البضاعة يا حاج دوغري .
البضاعة جاهزة في الحفظ و الصون يا أستاذ ممدوح .
تعالى اقعد كلك لقمة و اشرب الشاي و ريح شوية انت و رجالتك و بعد كده نتكلم في البضاعة ، هي الدنيا هتطير يعني .
لا معلش احنا واكلين وشاربين و مظبطين نفسنا ع الآخر يا معلم دوغري ، فين البضاعة .
طالما إنت مستعجل ، حاااضر هات يا ولد البضاعة .
فين فلوسك يا ممدوح باشا .
اتفصل الشنطة دي فيها ٧٥٠ الف جنية على داير مليم اتفضل عدهم يا معلم .
لا مش بنعد الدار أمان ، يا ولد هات العرايس الدهب من عندك .
خد يا ممدوح باشا عاين البضاعة بتاعتك حاجة ١٠٠ فل و ١٤ .
ممدوح يمسك بالعرايس ، و يقول
ضاعت فلوسك يا ممدوح ، يا ولاد الكلب ، إحنا اتنصب علينا يا اسمعين دي عرايس حجارة ، نهارك زي الزفت يا دوغري ، إنت مفكر هتخوفنا بالسلاح إللي معاك إنت و رجالتك ، أنا مبخافش و هوريك يا دوغري .
اسمعين : يا نهار إسود فلوس الناس راحت يا ممدوح الله يخرب بيتك .
الدوغري : امسكوهم يا رجالة و كتفوهم و عشوهم كويس ع الآخر .
بعد ساعة
اسمعين : آه حد يكسب فيا ثواب و يفكني يا ولاد الحلال ، آه أنا عطشان ، عايز أشرب .
ممدوح : و أنا كمان عطشان عايز أشرب .
السواق : الله يخرب بيوتكم أنا مالي و مالكم دي كات شغلانه سودة يا معلم دوغري أنا مليش دعوة بيهم أنا وريا كوم لحم بصرف عليهم إنما دول كل واحد بيصرف على نفسه .
المعلم دوغري : بس خلاص صدعتونا يا ولاد الكلب ، ولا يا عيسوي .
العيسوي : إيوة يا معلم دوغري .
اسقيهم يا وله ، اسقي الرجالة نية معدنية .
العيسوي يسقيهم ماء بمخدر .
بعد نصف ساعة .
الدوغري : المعلمين ناموا ، ولا يا عيسوي فكهم و حملهم إنت و الرجالة على عربية نص نقل و حطوا فوقهم برسيم إملوا عليهم العربية برسيم و في وسط الصحرا علي بعد ١٥٠ كيلو ارموهم و تعالوا بسرعة . Yes
تاني يوم الصبح
اسمعين : قوم يا ممدوح الله يخرب بيتك ، قوم يا أسطى ، المعيز و الخرفان عمالين بياكلوا من البرسيم إللي علينا .
ممدوح باشا : إيه ده ؟ إحنا فين ؟ مين إللي عمل كده فينا ؟
يا عم إنت ياعم يا بتاع المعيز .
الراعي يقترب من ممدوح .
- أيوه يا حاج ، إنتوا نايمين هنا ليه ؟
- يعني إيه نايمين هنا ليه ؟
هو أحنا فين يا عم .
- إنتوا في الفيوم .
- طاب و إيه إللي جابنا الفيوم إحنا كنا امبارح في قنا .
- اسمعين طاب هنروح إزاي ؟ اتصل لنا على حد يا ممدوح باشا .
- اتصل بمين ده المحمول و العربية اتسرقوا .
الله يخرب بيتك يا أم السعد عروستين دهب .
التعليقات مغلقة.