قريب الباشا ٢ مشهد تمثيلي “ع الترعة “تأليف محمد كسبه
واد يا اسمعين الباشا بيقولك نضف العربية اغسلها ياواد .
- و أنا مالي ما تنضفيها إنتي يا وداد
- كل واحد له شغلانه و دي شغلتك يا اسمعين .
- يوووه هو اسمعين هيعمل إيه و لا إيه ، ربنا يخدك يا باشه عشان نستريح كلنا .
- اسكت يا واد ليسمعك ، ربنا يخلي لنا الباشه و يعلي مراتبه قادر يا كريم .
- إيوه ربنا يعلي مراتبه ع الآخر عشان يقع من عليها و رقبته تتقطم .
- قطم رقبتك يا اسمعين ، كفاية إنه سايبك تقول إنك ابن عمه و ساكت .
- و هو يطول يبقى ابن عمي .
- أيوه على طولت لسانك دي ، انجر يا واد نضف العربية
اسمعين نضف العربية و نده للباشا
الباشا بص على العربية عجبته و هو بيركب العربية اسمعين بيكلمه .
عارف يا باشا ، إني ظبطت لك العربية خليتهالك على سنجة عشرة ، تحب أجربهالك يا كبير . - هو انت بتعرف تركب الحمار أصلا عشان تسوق عربيتي وسع يا غبي .
- أهو إنت اللي غبي
- بتقول إيه يا ولد ؟
- بقولك بحبك زي أبي .
- امشي يلا روح نضف الزريبة .
- و الله إنت تستاهل تترىط في الزريبة
- بتبرطم بتقول إيه يا ولد
- بقول ربنا ينجيك من كل مصيبة يا باشه
الباشا ركب العربية و ماشي بيها ببطء علي الطريق جمب الترعة .
اسمعين بيجري ورا العربية و بينده باشه يا باشه إنت نسيت المحفظة يا باشه
الباشا يفرمل بالعربية و ياخد المحفظة . - يلا روح نضف الزريبة يا طور .
- إنت إللي طور يا باشه .
- بتقول إيه يا ولد .
- بقولك وشك كله نور يا باشه
اسمعين راجع بيغني و هو ماشي جمب الترعة
يا حضرة الباشا
بنتك ثريا أحلى م البت بهية
إني وقعت في الترعة
و هي ضحكت عليا
و البت حلوة قوي
و ضحكتها أثرت فيا
يرضيك يا باشه
عشان بنت باشه
تهزئني و تفرج البلد عليا
عشان أبو ثريا براحتك يا ثريا
دنا لجل عيونك
أقع في الترعة كل شوية
إيه ده البت جمالات بت خالي أبو إبراهيم بتغسل المواعين في الترعة - يا بت با جمالات إيه الحلاوة دي يا بت
- طول عمري و انا قمر و إنت معفن طول عمرك يا ولا
- تتجوزيني با بت
- إنت إتهفيت في نفوخك يا ولا أنا اتجوزك إنت !!!! أصوم أصوم و أفطر على بصله .
- يا بت مش إنتي إللي هتتجوزيني ، دنا إللي هتجوزك .
- لا تجوزنى ولا أتجوزك غور من وشي يا معفن .
- ده إنتي إللي معفنة يا جملات هو فيه حد راضي يجوزك يا بت ، لولاش بس إني نفسيتي حلوة و بحب المخلل .
- إني مخلل يا حمار طب خد و تحدفه بالطوب .
- أي اي اي بس يا بت ده إنتي طلعت معفنة و هبلة كمان .
و الله الواحد بس حب يرفع معنوياتك . - ترفع معنوياتي طب خد كمان و تحدفه بالطوب .
التعليقات مغلقة.