قريب الباشا ” ٥ ” فنجان قهوة تأليف : محمد كسبه
اسمعين يدخل الفيلا و يتجه ناحية المطبخ فيسمع وهيبة بتغني
هاتي القلل يا و هيبة
و اسقينا حلاوة الزمان
المية من إيدك يا وهيبة
بتروي القلب العطشان
صوتك حلو يا وهيبة ، أنا نفسي في حتة م الوزة إللي إنتي بنتضفيها دي .
صحيح يا وله صوتي حلو ، عجبتك يعني .
ده إنتي تعجبي الباشا يا مربربة إنتي يا حلوة .
سيبك م الباشا ده عينيه زايغة و يندب فيها رصاصة ، ركز معايا يا سمعه ، يا رافع معنوياتي ، تجوزني يا وله .
هو الجواز ماله و مال حته الوزة إللي أني عايزها ؟
مهو لما تتجوزني كل يوم هتاكل بط و وزر و فطير و طواجن و حمام معمر .
بجد يا وهيبه أنا لو إتجوزتك هاكل وز و بط و هوبر لحمه .
و كوارع و بهاريز و فتة ، دنا هوريك إللي عمرك ما شوفته .
ليه هو إنتي روتانا سينما ؟
بصي يا و هيبه إنتي باين عيلكي معمولك عمل بوقف الحال و هتفضلي عانس طول عمرك .
جاتك بلوة يا اسمعين عمل إيه يا منيل على عينك ؟ و مين إللي عملهولي ؟ يعني مش هتجوز يا وله ؟
لا مش هتتجوزي و هتفضلي زي البيت الوقف .
يا نهارك إسود !!!! إنت بتفول في وشي يا وله ، يا هباب البرك إنته ، إمشي غور يا حمار .
الموضوع و ما فيه يا وهيبة ، إن العمل ده لازم يتفك .
و ماله شوف لي حد يفك لي العمل يا سمعه .
و لا أقولك …. بلاش يتفك عشان محدش يجوزك و يفضل طول العمر يدعي عليا .
خليكي من غير جواز أحسن .
يرضيك يا سمعه أعيش عانس ، طب قولي مين هو ابن المؤذية إللي عمل لي العمل ده ؟
و أني إيش عرفني يا وهيبة .
آه يا ناري دنا لو أعرفه أمسك في زومارة رقبته .
إيوه تمسكي في زومارة رقبته عشان ميعرفش يزمر بعد كده ، و يمشي في البلد من غير زومارة .
يا اسمعين قولي و حياة سيدي البهليطي مين إللي هيفك لي العمل ؟
أنا بفهم في الحاجات دي على قدي يا وهيبة .
يعني هتفك لي العمل يا اسمعين ؟
بعون الله هفك لك العمل ، جاتك فك وسطك .
بقى ده وسط ده ، ده وسط البلد كلها .
طب بص يا سمعه ، لا تفك العمل ولا غيره ، إنت تتجوزني أحسن ؟ هو إنت تطول يا وله ؟
لا طول و لا عرض ، ده إنتي حاجة كده ملهاش أول من آخر ، يعني إللي هيتجوزك مش محتاج مرتبة خالص .
أنا هكسب فيكي ثواب
هتتجوزني يا سمعه ؟
لا طبعا ده إنتي أكبر مني
يخيبك يا بعيد ، إنت أهبل و كداب كمان ، يا وله دنا كنت بروح معاك المدرسة و كنت معاك في نفس الفصل كمان ، و كنت بدافع عنك لما العيال كانوا بيضربوك عشان طولت لسانك إللي عايز قطعه يا إسمعين .
إيوه صح ، كنتي بتضربي العيال .
إنتي فاكرة الواد يونس إللي شتمني و حدفني بالطوبة .
إيوة فاكراه أنا ضربته عشانك .
لأ مضربتهوش إنتي قعدتي عليه بططتيه و مكناش عارفين نقومك من فوقه عشان إنتي تخينة و زي الدبدوب .
أني دبدوب يا قرد إنت يا معفن و تحدفه ببصله .
ممدوح ابن الباشا يدخل من الباب و ينده
بت يا وهيبة ، إنتي فين يا جاموسة
تطلع جري من المطبخ
إيوه يا سيدك أوامرك يا سيدي
غوري يا بت إعملي لي فنجان قهوة .
هوا يا سيدي، هعمل لك أحلي فنجال قهوة مظبوط .
تدخل المطبخ و تولع على القهوة
بقى يا اسمعين ، إنت بتقول إني اكبر منك ؟
إعمل لي سندوتش حلاوة يا هوبة يا عسل إنتي .
إيوة كده إرفع معنوياتي .
-خد السندوتش اهوه
هاتي بس انا قولت لك سندوتش حلاوة ، مفيش غير المربي يا اسمعين .
هاتي مربه مربه ،
و إحنا لاقين ، إنتي بقى عايزاني ، أرفع معنوياتك !!!! طب إزاي يا وهيبة ، ده إنتي معنوياتك تقيلة قوي ، دي محتاجة ونش يرفعها .
ابن الباشا بينده
فين القهوة يا بت يا وهيبة
حاضر يا ممدوح باشه ثواني و أجيبهالك .
إني زعلانة منك يا سمعه .
ليه يا هوبه ؟ هو إني أقدر أزعلك ؟ هاتي سندوتش مربة كمان .
خد جاك طفحه ، بقى أنا أكبر منك ؟
دحنا قد بعض يا وله .
لا مش قد بعض ، ده إنتي يجي ٢٠٠ كيلو صافي من غير العضم ، إنما أني ٧٠ كيلو بالعضم ، يبقى إنتي أكبر مني صح ولا لأ ؟
لا مش صح يا مضروب .
ممدوح باشا
يا بت يا جاموسة فين القهوة .
حاضر طلعالك بيها أهوه يا سيدي
و تطلع السلم
اتفضل يا سيدي أحلى فنجال قهوة
فين المية يا بت ، هو فيه حد بيقدم القهوة من غير ميه .
حاضر يا باشه ، هجيب لك ميه .
التعليقات مغلقة.