قريب الباشا ” ٦ ” الحضانة تأليف : محمد كسبه
وهيبة : يا اسمعين … إنت يا واد يا إسمعين
إيوه يا وهيبة ، مالك يا بت فيه إيه .
كلم يا اسمعين ، سيب الشاي إللي في إيدك و اطلع كلم ثريا هانم بسرعة .
هو ده وقته يا وهيبة ، هانم إيه !!!! و بتاع إية !!!! هو الواحد ميعرفش يشرب كوباية شاي بمزاج في البيت .
هات الشاي يا منيل على عينك و إجري بسرعة شوف الهانم عايزة إية
حاضر حاضر خدي الشاي أهوه جاتك طفحه يا بعيدة
إيوة يا ثريا هانم ، جاي أهوه يا ثريا هانم
يبص لها من تحت و ثريا هانم على السلم فوق .
لو سمحت يا اسمعين ممكن تروح الحضانة تجيب الهانم الصغيرة ، أحسن هي إتاخرت النهاردة و أنا مش متطمنة.
حاضر أوامرك يا ست الكل يا طيبة يا أميرة أنا رايح أهوه أجيب لك ميان هانم .
شكرا يا اسمعين
تحت أمرك يا هانم
يتجه اسمعين ناحية المطبخ
تعرفي يا وهيبة ، البيت ده كله مفهوش أحسن من الست ثريا ، بت أصول ، بت حلال ، ميطلعش منها العيبة أبدا ،حاجة كدة ذوق و شياكة ، تصدقي كل أما تكلمني أو تتطلب طلب ، تغمزني بحته بخمسة أو بعشرة جنية ، إيديها فرطة .
بصراحة يا اسمعين هي كويسة خالص و لسانها كده بينقط سكر ، هي غيرهم خالص .
يا رب تكون من نصيبي
إنت إتهبلت يا وله ، هي عشان متطلقة هترضي بيك .
هي تطول دنا قريب الباشا يا بت يا وهيبة .
ويذهب اسمعين للحضانة و يدخل الفصل
إيه ده يا أستاذ ، إيه إللي إنت بتعمله ده ، ده كده عيب نزل البت من على فخدك ، و متشلهاش تاني .
إيه ده إنت مين إنت يا حمار ؟ و بتتكلم كده ليه ؟ إنت داخل من غير كلام ولا سلام و كمان بتقل أدبك ، أمشي اطلع بره .
لا أنا مؤدب غصب عنك و عن إللي جابوك و مش طالع بره ، و مينفعش تقعد عيل على فخدك !!! هو فين المدير .
الأساتذة نجوى : إحنا معندناش مدير ، مديرة الحضانة تبقى مس ليلى.
يصرخ اسمعين
يا ست المديرة …. يا ست المديرة ، يا مس ليلى
أيوة أيوة إيه الدوشة دي كلها ، فيه إيه ؟ إيه إللي بيحصل ده ؟
فيه عيب بيحصل ، و حاجة ميتسكتش عليها ، الأستاذ الطويل العريض ده ، مقعد البت على فخده و بيملس على شعرها ، زي ما تكون بنته ؟
أيوه يا عم اسمعين زي ما تكون بنته ، إحنا هنا بنعامل الأولاد زي ما يكونوا عيالنا .
يا ست المديرة إحنا ناس فلاحين و ده ميصحش ، مينفعش إن شاب زي ده و هو بيعلم العيال يعمل كده .
يا عم اسمعين الأستاذ علي لسه جديد ، و أول يوم له في الحضانة النهارده ، ده المستر بتاع الإنجليزي .
انجليزي ولا طلياني ده هيكون آخر يوم له في الحضانة النهارده و عنهم ما اتعلموا إنجليزي .
يا ليلى هانم ، الراجل ده إللي اسمه اسمعين مش مظبوط ده أهبل و مش بيفهم ، و بيقول حاجة محصلتش .
يعني أني كداب و الله لضربك و فضحك في البلد يا علي .
لا ميصحش يا عم اسمعين ، إيه إللي إنت بتقوله ده ، سيبنا إحنا هنتصرف بمعرفتنا .
يا ليلى هانم أنا هقولك إللي حصل .
إتفضل يا مستر علي اتكلم و متقاطعوش خالص يا عم اسمعين
تمام يا هانم مش هقاطعه بس ميكدبش و ميغلطش
اتفضل اتكلم يا أستاذ علي
المدرسات في الحضانة بيضحكوا و بيغمزوا لبعض على الموقف
، البنت ميان جاوبت صح و زمايلها صقفوا لها و في آخر الحصة كانت بتعيط و عايزة تروح .
فأنا قعدتها علي رجلي و طبطبت عليها ، دي زي أختي الصغيرة .
يا أستاذ علي إللي إنت عملته غلط .
يا ست هانم غلط و لازم يترفد .
لا يا عم اسمعين مش كده ، كده هتبقى بنزود الغلط .
يا أستاذة ليلى أنا مغلتطش ده تصرف تلقائي ، دي زي أختي الصغيرة .
بص يا سيادة المديرة ، عقابا له يدفع ٥٠ جنية
ليه يا عم اسمعين
عشان يتعلم الأدب .
و هتعمل بال ٥٠ جنية إيه يا عم إسمعين .
هجيب بيهم جوايز للعيال الشطار
إللي حافظ كويس ، ياخد جايزة ، و إللي بيعيط و خايف ، مس نجوى تهديه و تلاعبه لحد ما حد من أهله يجي ياخده .
ماشي يا عم إسمعين إللي إنت عايزة هيتم بمعرفتنا .
اتفضل خد ميان وديها لأمها .
اسمعين يشيل ميان
شايفة يا سيادة المديرة أهو شايلها أهوه
أنا شايلها على كتفي ، مش على حجري
ينظر الاستاذ علي إليه بغضب شديد و يقول لنفسه
و الله لازم أوقعه في مصيبة اسمعين تربية الزريبة ده .
التعليقات مغلقة.