قريب الباشا ” ٧ ” ميان بقلم : محمد كسبه
اسمعين ماشي و معاه الطفلة ميان على الطريق الموصل للفيلا
- عمو اسمعين
- يا عيون عمو اسمعين ، حلوة أوي عمو دي يا ميان ، في عزبة العزايزة كلها محدش بيقولي يا عمو غيرك إنتي يا ميان .
- ليه يا عمو ، هما بيقولولك إيه ؟
- إللي بيحبني بيقولي يا سمعه و إللي مش بيحبني بيقولي يا حمار يا معفن يا رمه .
- عمو أنا نفسي أشوف بابا , أنا مش شوفته من زمان
- هو مش إحنا اتفقنا إنك تقولي لخالوا ممدوح يا بابا
- بس هو خالوا مش بابا ، لا يا ميونه هو بابا ، و بيحبك أكتر من عمو أشرف ، لا عمو أشرف هو بابا
و تبكي أنا عايزة أشوف بابا
يعطيها بسكويت و يقول لها - خلاص لما نروح الفيلا هخلي ثريا هانم مامتك تتصل ب بابا و يجي يشوفك
على الطريق يلاحظ البنت نعسه مع مني زميلتها ماشين و بيضحكوا . - بت يا نعسه إنتي مالك ، إحلويتي و إتدورتي كده ليه , كبرتي يا مفعوصة ، إنتي في سنة كام يا بت .
- في تانية عدادي يا واد يا اسمعين
- لأ … لأ …..لا .. بصي يا نعسه أني أكبر منك بكتير ، يعني لما تكلميني تحترميني يا نعسه .
تقوليلي يا عم يا خال يا أبا اسمعين ، و بعدين إيه اللبس إللي إنتي لابساه ده يا بت . - مالو اللبس مش عاجبك ، يعني مش حلو عليا ، ده آخر موضة يا عم اسمعين
- لا مش الفكرة هو حلو بس يعني كده هو مظبطك ع الآخر ، يعني زرار البلوزة الأخير إللي فوق ده لازم يتقفل ، و البنطلون ده كان لازم يوساع شوية ، و شعرك ده لازم يتغطى يا نعسه ، لازم تمشي زي الألف يا نعسة ، مش تضحكي و مش تجري مع زميلتك ع السكة ،لازم تفهمي إنك كبرتي و بقيتي واحدة ، فلازم تكوني محترمة .
- لأ مش همشي زي الألف ، أنا همشي زي البطة ، قصدي زي الياء البطة .
و تضحك بصوت عالي مع زميلتها مني و تقول له - إنت بتكلمني زي جدي أبو ياسين
- هو لسه عايش ، ده كان مبيسبش حد في حاله ، كان بيتريق على طوب الأرض ، سلمي لي عليه يا نعسه .
- و إني مالي ما تروح تسلم عليه بنفسك .
صاحبة نعسه تنظر للطفلة ميان - مين الحلوة دي يا عمو
- الحلوة دي يا منى تبقي ميان هانم بت ثريا هانم .
يتركهم و يمشي على الطريق بالقرب من الفيلا - خلاص يا ميان وصلنا
- الفيلا أهه .
- أنا تعبت من المشي يا عمو
- ممكن تشيلني
- حاضر يا ميان هانم
- يحملها علي كتفه
عم عسران ماشي مع ابنه و ينده على اسمعين - واد يا اسمعين يا هباب البرك إنته
- أهو إنت إللي هباب البرك يا عسران و إنت زي البغل كده و دماغك زي دماغ العصافير .
- إنت ضربت الواد ياسر ابني ليه ؟
- هو مقلكش هو عمل إيه ؟
- ما يعمل إللي يعمله إنت ملكش ضرب عليه ، و لو مديت إيدك عليه تاني ، إني إللي هضربك ، هو عمل إيه ؟
- ابنك كل شوية يشوط الكورة جوة الفيلا و ينط هو وزمايله يقطعوا الزرع و الورد و يحدفوا الكلب المربوط في الفيلا .
أنا بقي كلمت ابنك هو و زمايله كذا مرة ، و هو مش بيسمع الكلام
في آخر مرة بقي أنا ضربته ، لو مش عايزني أضربه إنت حر ، أنا هطلق كلب الباشا عليه عشان ينهش في لحمه ، و إنت حر مع الباشا .
أني أول ما هقول له أن ابنك بينط سور الفيلا هيقول عليه حرامي .
إيه رأيك أضربه ولا أخلي الكلب ينهش في لحمه .
لأ اضربه و اكسر دماغه طالما غلطان .
مانا كنت بضربه و معجبكش
لا سيدي عجبني عجبني .
و يضرب ابنه انت يا ابن الكلب اسمع كلام خالك اسمعين و متهوبش ناحية سور الفيلا .
أي أي حاضر يابا مش هلعب ناحية الفيلا
اسمعين يصل للفيلا و يمشي عسران مع ابنه بعيدا .
التعليقات مغلقة.