قريب الباشا ” ١٢ “
العرافة و الدرويش
تأليف : محمد كسبه
العرافة تدخل العزبة مرتدية الزي الغجري ، الجلباب الأسود المطرز و تحمل القفة على رأسها ، يرتسم على وجهها الحزن و الكآبة ، الزمن قد نقش التجاعيد باحتراف على وجهها القمحي اللون ، يظهر أسفل شفتيها الوشم على شكل ثلاثة خطوط خضراء متوازية .
تسير في الطريق المؤدي للفيلا من ناحية السوق و من خلفها الدرويش يتوكأ على عصاه و يتابعها .
- حي …. حي … الله حي … مولد يا دنيا … مولد و صاحبه نايم … الله حي
- أبين زين أبين و أوشوش الودع ، أقرا الفنجان ، و بقرا الكف ، و أعرف لك الطالع .
- الله حي …. الله حي …. كله هيبان لما يؤون الأوان .
- أبين زين أبين و أقولك ع إللي جاي و أحكيلك إللي فات .
إيه يا راجل إنت يا شحات إنت دايما بتلاحقني في كل حته بروحها غور بعيد عني بوشك النحس ده .
- ابعد عنك إزاي ، هو حد بيهرب من قدره و نصيبه ، ولا حد بيهرب من حبيبه، مهما تبعدي لازم هتقربي الله حي
- خليك عايش في الوهم كل إللي راح ، كان هم و إنزاح .
- بت يا نعسة ماتيجي نروح للوليه إللي بتبين الزين دي خليها تشوف لنا البخت .
- دي منظر واحدة يا مني تبين زين ، دي تبين مصيبة ، تبين بلوة ، يا بت بلا قرف إبعدي خلينا عايشين ، بصراحة أنا بخاف من الناس دي .
- تعالي بس متخافيش ، أدينا هنتسلى شوية و نضحك ، يا خالة إنتي يا ست .
- أيوة يا زينة الصبايا ، تحت أمرك يا قمر .
الدرويش : متصدقوهااااش ، محدش يعرف الغيب إلا علام الغيوب حي… الله حي . - العرافة : غور بعيد عن هنا يا غراب الشوم خليني ألقط رزقي .
تعالي يا صبية متخافيش ده راجل أهبل .
مني : و النبي يا خالة أنا عايزة أعرف بختي ، و عايزة أعرف حظي في الدنيا .
نعسة : و أني كمان يا خالة عايزة أعرف بختي ، دنا بحلم إني بطير و بطلع لفوق لفوق خالص . - إرمي بياضك يتحقق مرادك يا بنية .
تجلس العرافة على الأرض و تضع القفة بجوارها ، تفتح منديل به قليل من الرمل و بعض الأصداف الصغيرة .
-مني : خدي خمسة جنية أهه و اقري لي الطالع عشان قلبي يستريح .
تمسك العرافة بالأصداف و تقربها من فم مني - وشوشي الأصداف و قوليلها ع إللي إنتي عايزاه .
تهمس مني للأصداف ، تغلق العرافة يدها على الاصداف ثم تلقيهم على الرمل
و تقول : بصي يا بنية ، الفرحة أكيد جاية ، بس مش دلوقت ، هي متأجلة شوية ، الأيام الجاية هتكون صعبة قوي عليكي ، و هتفقدي حد عزيز عليكي ، و الدنيا هتعلمك أكبر درس في حياتك ، إن إللي يمشي عدل يحتار العدو فيه – و تنظر العرافة لنعسة بعين الشفقة – لكن إللي بيمشي عوج هتهبش لحمه كلاب السكك .
مني : يعني أنا هفرح ولا هزعل يا خالة أني إتلغطبت و خوفت .
العرافة : إنتي هتزعلي على حد بتحبيه ، على حد قريب منك و هتفارقيه ، لكن الدنيا بعد كده هتضحك لك و هتبقى زي الفل .
نعسة : خدي يا خالة عشرة جنية و لا أقولك خدي عشرين ، بس أنا عايز حظي كويس
العرافة تنظر إليها بحزن و تلقي بالأصداف على الرمل ، و تنظر إليها ولا ترغب في الحديث .
نعسة : مالك يا خالة إنتي زعلانة ليه ، فيه إيه مش راضية تتكلمي ليه ؟ - تنظر إليها العرافة ولا تريد الكلام معها .
- إني عارفة إني عمري قصير ، و فرحتي قليلة و بختي مايل ، بس و النبي تطمنيني يا خالة ، حلفتك بالغالي .
العرافة : كله مقدر و مكتوب يا بنيه ، ومن قديم الأزل . - مش فاهمة إللي بتقوليه ، فهميني أعمل إيه عايزة فلوس تاني يعني .
- كل روح هتروح و إللي بيحلم إنه بيطلع فوق هيطلع قريب ، يا ريت الحظ و الفرح بيتشري بالمال يا بنيتي .
العرافة تشيل القفة و تمشي .
و تقول : خدي بالك من نفسك يا نعسة . - إستني يا خالة ، إستني يا خالة لسه الكلام مخلصش .
الدرويش : حي … الله حي .. كل إللي اتقال مكتوب ، و المكتوب مفيش منه هروب . - يا مني أني خايفة من الكلام إللي الست دي بتقوله ، دي خوفتني أكتر ماني خايفة ، يا خسارة الفلوس إللي خدتها .
- متشغليش بالك يا نعسة ، ده كلام فاضي ، كبري دماغك يا بت ، هي هتقول لكل الناس حظكوا حلو ، لا طبعا لازم تفرح ناس و تزعل ناس عشان تاكل عيش وخلاص .
مالك يا بت زعلانة كده ليه ؟ وشك متغير تعالي نشتري من دكان الواد أسامة إللي بيعاكسنا و بيضحكنا تعالي يا نعسة يلا بينا .
الدرويش : حي الله حي …. متصدقوهاش دي كدابة ولا تعرف حاجة ، ربنا هو المطلع و هو الكاشف الله حي .
العرافة : أبين زين أبين و أعرف الطالع .
ميان أمام الفيلا
- مين الست دي يا بابا ممدوح .
- دي واحدة كدة بتستعبط على العالم .
- يعني بتبيع إيه يا بابا ممدوح ؟ أنا عايزة أشتري منها .
- دي بتبيع كلام و بتضحك ع الناس بكلام فارغ .
إنتي يا ست يلي بتوشوشي الودع و بتعرفي الطالع .
العرافة : إيوة يا سيدي تحت أمرك و تنظر للطفلة ميان و تقول : طاير يا حمام ، العمر راح بسرعة يا حمام .
ثم تنظر لممدوح باشا .
و تقول : تحب يا سيدي أشوف لك الطالع ، و لا أقرالك الكف ولا أقرالك الفنجان .
إنتي بتعرفي كل كده إنتي كدابة و مبتعرفيش تقري أصلا ، طب خدي الجورنال ده إقري لي منه سطر ، سطر واحد بس ، عشان أعرف إنك بتعرفي تقري . - للاسف يا باشا أنا مبعرفش أفك الخط أنا بعرف الطالع .
- هههههه طالع فين .
- متتريقش عليا يا باشا ، بعد إذنك أنا عايزة أشوف أكل عيشي .
الدرويش : حي …. الله حي ، متصدقهاش و بطل إندهاش ، دي كلامها بكاش حي …. الله حي - هو إيه إللي بيحصل العزبة اتملت أونطيجية و شحاتين .
- عيب يا بيه ، إنت هتشوف الطالع ولا أمشي ؟
- خدي عشرة جنية أهه و شوفي لي الطالع .
تجلس على الأرض و تفتح المنديل و تطلب من أن يوشوش الأصداف ، فيفعل ، تأخذ الأصداف و تغلق عليها يديها و تلقي بهم علي الرمل
و تنظر إليه و تقول : هي عرفاك وقريبة منك و إنت متعرفهاش صحيح الدم بيحن ، بتحبها و بتنكرها ، و قدرة القادر إنكتراعيها ، الحظ مال م المشي الشمال ، عروسة دهب هتدوخك ع الفاضي ، عروسة صغيرة هتروح من إيدك الجمعة دي ، عروسة زي الفل دبلت و مال بختها على إيدك ، قريبك و بتستقل بيه هينصفك و هيخافظ عليك .
- أنا مش عارف إنتي بتقولي إيه ، كلامك مش مفهوم وضحيه ،
- بكره هتعرف ، و هتعترف بيها و هتحارب الدنيا عشانها.
- هي مين ؟ هي مين ؟ يا ست وضحي كلامك .
- إللي في إيدك .
- دي بنت أختي .
- بابا ممدوح أنا خايفة م الست دي هي بتبص لي كده ليه ؟ هي عايزة تخطفني ؟
- لا متخافيش يا حبيبتي ، أمشي يا ولية يا هبلة ، غوري في داهية .
- تبكي ميان و تقول : مشيها بعيد يا بابا ، الست دي وحشة ، أنا عايزة ماما .
- حاضر تعالي هوديكي لماما ثريا .
- لأ أنا عايزة ماما التانية إللي بتيجي تلعب معايا في الحضانة .
- إيه الكلام إللي بتقوليه ده يا ميان !!!!!
الدرويش : حي …. الله حي ، الله علام الغيوب و لا يعلم الغيب إلا هو .. الله حي .
- مش ناقصة يا عم الدرويش إنت كمان وسع كده خليني أمشي .
تمشي العرافة و خلفها الدرويش يقابلها اسمعين في السوق .
- إنتي يا ست يلي بتعرفي البخت .
- أيوة عايز مني إيه ، أشوف لك البخت .
- يا ريت و تخلي بختي حلو شوية ، علي راي المثل ” يا بختي ليه من وسط البخوت لبخت ، الناس في عز اللبخ عدت ، و إني إللي في وسط النشف لبخت “
بقولك إيه
- قول يا عمده .
- شوفي لي البخت بس بشرط ، خلي لي بختي حلو شوية , يعني حطي لي عليه ٤ متالق سكر و قلبيهم .
- الحظ مش بإيدي ده بإيد ربنا .
- إرمي بياضك يتحقق مرادك .
- خدي أدي صوبع عسلية و توفاية و كرملتين ، إستني شوية ، خدي حبة لب … أهم ، لب سوبر مش خسارة فيكي .
- افتح إيدك .
- الشمال ولا اليمين ، ادإشمعنا أنا إللي هفتح إيدي ، و مع ذلك إقري لي الاتنين و شوفي لي الطالع و النازل .
- إنت عايز إيه بالظبط .
- أنا عايزك تقوليلي كلمتين حلوين و خلاص ، ولا أقولك أنا عارف ، أنا حظي حلو من يومه ، هو بيلطش شوية بس هيحلو ، أني مش عايزك تقري لي حاجة .
الدرويش : جدع إنت جدع سيبها على الله ، حي ….. الله حي .
التعليقات مغلقة.