قريب الباشا ” 19″ ماتش المنتخب بقلم : محمد كسبه
في القهوة التليفون بيرن
المعلم شرف : ألو سلام عليكم ، إزيك يا أبو مصطفى.
- إزيك يا أبو خالو ، أخبارك إيه .
- يا راجل بقالك مدة مبتسألش ولا كننا ولاد خال .
- معلش و الله الدنيا مشاغل ، بس من وقت قريب كنت بزور أبوك و كانت حالته صعبه قوي ، و إنت كنت مسافر ، إلا هو عامل إيه كويس ولا زي ما هوه .
- بص يا أبو خالو الدوام لله ، خالك مات ، ادعي له بالرحمة ، إحنا هنطلعوا بيه المغربية .
- البقاء و الدوام لله البركة فيك يا أبو مصطفي ، هو أنا آخر مرة شوفته كان تعبان جامد .
- و الله زي ما إنت عارف هو عنده الكبد و كان في المرحلة الأخيرة كان بيعمل بذل و بعدين جات له غيبوبة مات فيها النهارده الصبح الساعة ٧ ، و أنا محبتش أقلقك فبلغتك دلوقتي الساعة ١٠ .
- خلاص أنا هقفل القهوة و أجيب الواد حسونة يخدم ع الناس في العزا ، ربنا يصبرك يا أبو مصطفى البقاء لله .
ولا يا حسونة سك ع المشاريب و حاسب الزباين ، و لم العدة و يلا بينا ، خالي أبو نادية مات يا له . - الزباين : البقاء لله يا معلم .
- البقاء لله يلا يا رجالة بالإذن كده عشان هنقفلوا .
في الفيلا تليفون ثريا هانم بيرن .
- ألو إزيك يا عمتو ، عاملة إيه وحشاني و الله
- يا بت يا بكاشة لو كنت وحشاكي بصحيح كنتي تيجي تزوريني ، زي ما كنت بتعملي ، أو حتى كنت اتصلت عليا .
- معلش يا طنط آسف و الله بجد ، بس أنا مشغولة الايام دي .
- مشغولة ليه بقى ، هو إنتي عندك إيه يشغلك ؟
- لا معنديش أهم منك و الله ، ده إنتي غالية عليا .
- تعالي بقى النهاردة أنا عازماكي ع الغدا ، و كمان على عيد ميلاد أميرة بنت بنتي ، و هاتي ممدوح معاكي .
- حاضر يا عمتو أنا جاية أنا و ميان ، و كمان هجيب أحلى
هدية لأميرة ، و عقبال ما تبقى عروسة و تحضري فرحها ، إنما ممدوح إنتي عارفة مبيحبش الحاجات دي . - يلا باي يا ثريا ، أنا منتظراكي ع الغدا أوتدعي تتأخري .
- لأ أنا هقوم أغير و أجي على طول باي يا عمتو .
ممدوح باشا ينادي على اسمعين . - ولا يا اسمعين .
- صباح الفل يا ممدوح باشا قول لوهيبة تجهز لي الغدا بسرعة ، معرفش أنا قايم ليه جعان كده .
- حاضر يا باشا ، ولا يا علي قول لوهيبة تحضر الأكل لممدوح باشا .
- حاضر يا اسمعين باشا ، يا وهيبة جهزي الأكل لممدوح باشا .
- وهيبة : حاضر يا باشا ، ثواني و الأكل يكون جاهز عندك .
- ولا يا اسمعين ، أنزل روق لي العربية و ظبطها كده .
- حاضر يا باشا ، إنت مش ناوي تعلمني السواقة بقى يا باشه .
- حاضر هعلمك بس مش دلوقت .
- اوكيه يا دوحة ، أنا نازل أظبط لك الدنيا بس إنت رايح فين .
- و إنت مالك يا غبي ، هو أنا لازم أهزئك كل يوم .
- لا مش كل يوم يا دوحة ، إنت لازم تحسن إسلوبك معايخ يا إما هسيب لك البيت و أمشي .
- لا و الله إيه خفية الدم دي يا اسمعين ، بطل رغي و روح جهز العربية بسرعة يا غبي .
ممدوح بيكلم نفسه ، أقول إيه ! أقول إني أنا مش عارف أنا رايح فين ، أقوله إني رايح أتصرمح و أهرب من جو البهايم و الحمير إللي أنا بتعامل معاهم هنا .
بعد العصر في العزبة الأهالي
- إحنا هنتفرج ع الماتش فين النهاردة .
- - ده النهاردة الماتش النهائي ماتش مصر و السنغال إللي هيأهلنا لكاس العالم .
- اسمعين : طاب ما تروحوا تتفرجوا ع الماتش ع القهوة .
- أحد الاهالي : المعلم شرف عنده حالة وفاة و قافل القهوة و الماتش هيلعب بعد العشا .
ممدوح : بقى كده و ظل بيفكر في سره .
الباشا مش هنا هو في الكباربة .
و ممدوح باشا سافر طنطا يتصرمح هناك .
و ثريا هانم عند عمتها في عيد الميلاد .
و وهيبة بتروح من الفيلا العصر .
يعني الفيلا مفيهاش غيري أنا و الواد علي . - طاب يا رجالة أنا هحل لكم المشكلة دي .
- هتحلها إزاي يا اسمعين ، هتعمل إيه يعني ؟
- أنا هفتح لكم الفيلا و هتتفرجوا ع الماتش في الصالة في الدور الأرضي .
- و القعدة بالمشاريب و التذكرة ب ٣ جنية .
إيه رأيكم ، ده الشاشة ٥٦ بوصة يعني استاد لوحدها . - و الله فكرة كويسة يا اسمعين .
- بس بشرط محدش بجيب سيرة للباشا ولا لعياله تمام يا رجالة .
- تمام التمام يا اسمعين .
في الفيلا قبل العشاء - ولا يا علي إللي يدخل خد منه ٣ جنية رسم دخول تمن التذكرة ، و بعد ما تلم الفلوس تديهملي و تروح دوغري ع الزريبة تخلي بالك من البهايم .
- حاضر يا اسمعين .
- اسمعين باشه يا حمار .
- حاضر يا اسمعين باشه .
علي يتحدث إلي الأهالي - كله يحاذي على إللي قدامه التذاكر بالدور يا بهايم ، كل واحد يقعد في رقمه إللي إحنا محددينه على الأرض ، و ممنوع الفوضى و ممنوع إثارة الشغب و ممنوع الهتافات العنصرية فاهمين يا بهايم .
- خلاص يا علي فهمنا .
- علي باشا يا بهايم .
- اسمعين : ولا يا علي ، قولهم إننا بنشجع منتخب مصر ،إللي لابس الفانلة الحمرا و الشورت الابيض ، و أي واحد هيشجع السنغال هنشحته بره الفيلا .
اسمعين للزباين - القاعدة بالمشاريب و إللي مش هيطلب يطلع بره ، إللي عايز سحلب ب ٥ جنية ، الحلبة ب ٣ جنية و العناب و الشاي و الينسون ب ٣ و الكانز ب ٧ جنية .
خارج الفيلا .
- ولا يا محروس إنت شايف إللي أنا شايفه ، واخد بالك يا له .
- فيه إيه يا إبراهيم .
- يا حمار البلد كلها جوة الفيلا ، و الواد علي سايب الزريبة و بيتفرج ع الماتش .
- طاب هي النتيجة كام كام يا إبراهيم .
- و احنا مالنا يا غبي .
- احنا مالنا إزاي ده منتخب مصر بيلعب و لازم نشجع بلدنا .
- يا حمار نشجع المنتخب إيه ، إحنا عايزين نشوف شغلنا يا له .
- شغلنا إللي هو إيه يعني هو احنا بتشتغل أصلاً .
- يا غبي أنا قصدي نسرق الزريبة .
- هنسرق الزريبة إزاي ؟
- انا عارفك غبي مش هنسرق الزريبة ذات نفسها ؟
- يعني إحنا هنسرق الزريبة ولا لأ ، ما أنا لازم أفهم .
- يا حمار إحنا هنسرق جاموستين ، بقرتين ، خروفين كده يعني ، بص أنت هتدخل الزريبة و تطلع لي البهايم و أنا هأمن لك المنطقة و هتصل على مسعد سواق النص نقل يستنانا عند الكوبري و ناخد البهايم نبيعهم في سوق الأربع ولا من شاف ولا من دري .
- بس ده الباشا عنده بهايم يامه و النص نقل مش هتكفي .
- خلاص أنا هقول للسواق يتصرف لنا في عربية ديهاتسو .
- تمام اتصل لنا بالسواق يلا .
- طاب روح شوف نتيجة الماتش كام كام و فاضل كام دقيقة ع الماتش و أنا هتصل ع السواق .
إبراهيم يدخل الفيلا
- علي : هات ٣ جنية تذكرة .
- لا يا علي أنا مش هتفرج إنا عايز أعرف النتيجة .
- مصر كسبانه واحد صفر و محمد صلاح ضيع كورة إنفراد .
- طاب إحنا في الدقيقة الكام .
- اسكت بقى و غور الشوط التاني هيبدأ أهوه .
- كويس مصر هتكسب و أنا هروح ع البيت عدل .
يغادر الفيلا و يتجة بالقرب من الزريبة . - فاضل لسه الشوط التاني كله يا وله يا إبراهيم .
- ولا يا محروس العربية الديهاتسو جاية من هناك أهه و داخلة علينا .
- طلع البهابم بسرعة .
- كام واحدة .
- طلع كله بسرعة يا حمار .
- ولا شايف العربية إللي واقفة هناك دي و قايدة كشافات النور .
- الواد السواق ده باين عليه بيفهم .
- اسحب ياله ادي جاموسة و ادي فحل و أدي بقرة و ده عجل صغير و ادي خروفين .
- كفاية كدة الله يخرب بيتك .
الباشا عند الكوبري بتصل ب اسمعين . - ولا يا اسمعين .
- إيوة يا باشا .
- إيه الدوشة إللي عندك دي .
- لا متشغلش دماغك يا كبير .
- فيه حد بيسرق البهايم من الزريبة يا اسمعين .
- إنت فين يا باشا .
- انا واقف بالعربية عند الكوبري .
- اسمعين : يا رجالة فيه حرامية بيسرقوا البهايم من زريبة الباشا هجوم هجوم امسكوهم .
كل الزباين في الفيلا يخرجوا بسرعة ناحية الزريبة و يمسكوا ابراهيم و محروس .
الباشا يصل الفيلا - إيه إللي بيحصل في الفيلا ده يا اسمعين .
- ده كمين أنا عامله للحرامية يا باشه ، و إنت جبت في وقت غلط .
- كمين إيه يا غبي ، إنت بتستعبط .
- لا يا باشا إنت جيت و اتصلت في وقت غلط .
- مش فاهم .
- صحيح و إنت هتفهم إزاي ،ده تخطيط على أعلى مستوى و كنا هنظبطهم متلبسين ، إنت شوفت الهجوم إللي حصل عليهم .
تخيل لو الأهالي مش هنا كانوا الحرامية عملوا إية دول كانوا سرقوا الفيلا و ولعوا فيها . - طاب و إيه الناس إللي كانوا في الفيلا دي يا اسمعين .
- انا عرفت خطة الحرامية و كان عندي علم بالسرقة و بالتوقيت إللي الحرامية حددوه يا باشا ، هو أني بلعب .
- و بعدين عملت إيه .
- فتحت الفيلا للأهالي زي ما إنت شوفت عشان يتفرجوا ع الماتش و ساعة الصفر كانوا هيهجموا ع الحرامية .
- و إنت لما اتصلت يا باشا بوظت لي الخطة .
- بس إنت كده قلبت الفيلا لقهوة يا اسمعين .
- مهو عشان الحرامية يتطمنوا و يحسوا إن وجود الناس هنا طبيعي جدا يا باشا ، و كمان يا باشا شوف أدي ٩٦٣ جنية مكسب ساعتين حلال عليك يا باشا .
- يعني إحنا كسبنا دول في ساعتين بس !!!!
- أيو الله يا باشا ، بس هات ٢٠٠ جنية حساب البضاعة و ٧٥ جنية يوميتي و ٥٠ جنية الواد علي و الباقي لك يا باشا .
- يعني يا اسمعين لو فتحنا قهوة في العزبة هنا هنكسبوا منها .
- أكيد بس أني مش فاضي للشغل ده دي كانت خطة عشان أقبض ع الحرامية .
- طاب و إحنا هنعملوا إية مع الحرامية يا اسمعين .
- لأ إحنا مش هنعملوا حاجة ده الأهالي عملوا معاهم الواجب و زيادة .
التعليقات مغلقة.