قريب الباشا ٣
ع الطريق
تأليف : محمد كسبه
اسمعين ماشي بيكلم نفسه
جتك خابط في دماغك يا جمالات ، آآآه يا دماغي ، آآآه يا راسي
كده تحدفيني بالطوبة يا بت ال….. الناس… الناس إللي ميهونش عليا أشتمهم عشان هنبقى نسايب .
- تبقى نسايب !!! نسايب مين يا اسمعين ؟ هو إنت حد يرضى بيك !!! ده إنت خدام الباشا يا وله .
- الباشا يبقى ابن عمي يا عرفان ، يلي شبه الخرفان .
- إني برضه إللي شبه الخرفان يا غراب البلد ، بص يا اسمعين .
- لا مش باصص
- ياد بص لى ياله
- لا مش باصص لك و لا هعبرك برضه .
- طاب اسمع يا اسمعين
-حلوة … حلووووة بس برضة مش سامع .
ينفعل عرفان و يمسكه من الجلابية و يشده إليه و يقول - إنت هتخش لي قافية يا اسمعين !!!! إنت متعرفش إني متكلم على جمالات .
- طاب و إيه يعني !! هو إنت لوحدك إللي متكلم عليها ؟ ما البلد كلها بتتكلم عليها !!!
-ينفعل عرفان و يتكلم بصوت عالي و يقول
بيتكلموا عليها بيقولوا إيه يا اسمعين ؟ - ما يقولوا إللي يقولوه و أنا مالي ، و بعدين إنت مالك مسكت في الكلمة كده ليه يعني ؟
أنا قصدي يا عرفان إنت متكلم عليها ، إنما أني متكلم معاها .
أي و الله متكلم معاها ، و هناك فرق يا غبي – ينظر إليه بغضب – بين متكلم معاها و متكلم عليها ، أني بقى مظبط الدنيا هههههه إنت مشوفتهاش وهي بتجري ورايا و بتحدفني بالطوب !!!! - شوفتها يا اسمعين
- كان نفسك تحدفك بطوبة !!!
- لا يا سيدي .
- عرفت إني سيدك يا عرفان ، إنت لسه قايل لي يا سيدي بعضمة لسانك إللي هياكلوا الدود ، لأ هياكلو التعابين إللي زيك يا وله .
- هي لما تحدفك بالطوب تبقي بتحبك !!!
- و إنت إش عرفك بالحب يا جاهل ، أي و الله جاهل إنت مسمعتش المثل إللي بيقول ما حب إلا بعد عداوة و إهي العداوة إنت شوفتها بعينك إللي هياكلها الدود برضه ، يبقى مفضلش إلا الحب يا وله .
- يا إسمعين متدايقنيش و إفهم يا ابن الناس ، ابعد عن جمالات ،ملكش دعوة بيها .
- و إني كت لازق فيها ماني بعيد أهوه
- ياد بطل إستعباط و حط عقلك في راسك تعرف خلاصك ، ابعد عن جمالات.
- أحط عقلي في راسي إزاي يعني ، مهو محطوط في راسي يا عرفان .
ينظر إليه عرفان بغضب و يشير إليه باصبعه كنوع من التهديد . و يمشي بعيدا .
اسمعين بيكلم نفسه على الطريق و يقول - امشي جاك خابط في نفوخك يا عرفان يا ابن أم عرفان .
قال ابعد عن جمالات قال !!!
دي جمالات دي زي طبق المهلبية حاجة كده فرنساوي علي بلجيكي حلوة بلجيكي دي .
جمالاااات جاااجاجاااا
جمالااات دي بطة بلدي
بتحبك يا ابن بلدي
متعلمة في المدارس
و عيونها حلوة خالص
و ضحكتها ورد بلدي
يا حلوة بلاش تعاندي
يا بت عليا ردي
ده الحب في القلب ناقص
جمالااااات جاا جاجاااا
و أنا ماشي الساعة سبعة
شوفتها بتغسل في ترعة
موااااعين …… مواعينا
خميس و جمعة
و النار في القلب والعة
أيوه ع الحب و سنينه يا بلد !!!!
التعليقات مغلقة.